Spurs-in sum an ngah

Tottenham Hotspur chuan an club chanchina sum an lakluh hnem ber ṭum an tawn thu puangin nikum khan pound maktaduai 306.3 an lalut.

Premier League club hian kum 2016 khan pound maktaduai 209 an lalut a, heta ṭanga chhut chuan an sum lakluh punna zat hi pound maktaduai 97.3 ngawt a ni.

Tottenham chairman Daniel Levy chuan an club chuan hun hriatreng tlak an tawn mek thu sawiin hma hun eng zawk an neih theih nan thiam taka kal zel a pawimawh thu a sawi.

Khawi ami nge?
Spurs sum lakluh 46% ngawta a punna chhan ber hi Premier League TV deal thar leh Spurs-in Champions League an khelh avanga an sum hmuh pung chu a ni a, Europe-a club inelna sang ber an khelh avang ringawta an sum hmuh belhkhawm pawh hi pound maktaduai 44.6 a tling hial a ni.

TV deal thar leh media revenue aṭanga an sum hmuh hi 2016-a pound maktaduai 94.8 an hmuh aṭangin pound maktaduai 149.8-ah a kaisang dawrh a, tualchhung cup inelnaa an sum hmuh chu pound maktaduai nga a tling.

Spurs-in sponsorship vel aṭanga an sum hmuh chu pound maktaduai 54.7 a ni a, club jersey leh bungrua an hralhna ringawt pawh pound maktaduai 14 a tling. Hei lo pawh hi sum hmuhna tam tak an nei a, tarlan vek sen a ni lo.

Stadium thar
Spurs an hausa tual tual a, an hausakna hi belhchhah a la ni dawn chauh niin a lang. White Hart Lane chhuahsana khelmual atana Wembley Stadium hmang mektu team hian stadium thar an sa mek a, pound maktaduai 750 man stadium hi season tharah an luah hman an beisei.

London club hian season tharah chuan an stadium hi luah hman an inbeisei tawh a, mi 62,000 lenna tura siam a nih avangin gate ticket aṭang ringawt pawhin an sum hmuh hi maktaduai telin a pung leh dawn tihna a ni.

Spurs hian stadium bakah club training ground an siam ṭha mek bawk a, mikhual thleng thei turin an training ground-ah hian mut pindan 46 an dah thar dawn a ni.

Player hlawh pun?
Spurs sum lakluh a pung zel a, season tharah Champions League an khelh ngei a beiseiawm bawk avangin an dinhmun hi a duhawm hle. Hetiang boruak karah hian player hlawh chungchanga dan khauh tak nei club hian player langsar ho hlawh an pun vak ang em tih chu zawhna awm a ni.

Mahse, chairman Levy chuan kum 17 chhung a lo kalpui tawh player hlawh kalphung chu khauh taka an kalpui chhunzawm zel tur thu sawiin, "Tun mai ni lo nakin hun thlengin kan thlir a ngai a ni," a ti a, sum hman uchuak a tum lo.

Hetihlai hian Spurs hian manager Mauricio Pochettino-a'n chhuahtir a phal lohte chu sum tam tak pawhin chhuahtir an tum dawn lo nia sawi a awm a, Harry Kane leh Dele Alli chu cham zel tura beisei an nih laiin defender pahnih Toby Alderweireld leh Danny Rose dinhmun erawh a chiang lo thung.