Conte a lungawi lo - Vialli

Chelsea manager hlui Gianluca Vialli chuan tuna Blues enkawl mektu Antonio Conte chu a lungawi lo hle niin a sawi a, club chhuahsan a hreh lo niin a sawi bawk.

Italian manager Conte-a'n season hmasa khan Chelsea a enkawl ṭan a, a kum khatnaah Premier League nomawi a chawi nghal. Mahse, beisei angin season an hmang chhunzawm lo - tun dinhmunah pangana niin, Champions League khel phak lo dinhmunah an ding mek.

Juventus striker hlui, tun hma lama Chelsea enkawl tawhtu Vialli chuan, "Player hralh leh lakluh chungchangah Conte hi a lungawi lo a, club chhuahsan hlan a nghakhlel tawh hle. Chelsea hi chuan club ngaihdan anga kal thei manager an mamawh a ni," tiin a sawi.

Chelsea hian season tharah UCL an khel phak lo a nih chuan Conte hmalam hun hi a chiang lo zual tura ngaih a ni. Italian manager hi an ram team enkawl tura sawi thawm a awm a, French club hausa Paris Saint-Germain nen pawh sawi zawm a ni bawk.