Spurs-in an club record siam

Tottenham chuan nikum June 30 thlenga an sum hui luh chu pound maktaduai 306.3 a nih thu an puang a, kum khat chhunga an club-in sum a huiluh hnem ber ṭum a ni.

Spurs hian kum hmasa lama an sum lakluh £209.8m aiin £96.5m in a pung a, a punna hi 46% zet a tling pha hial. An pawisa lakluh tam tak thut chhan hi Premier League-in kum thum chhung atan TV lama an pekchhuahnaa contract ṭha zawk an ziah vang a ni a, Spurs hian heta ṭang hian £149.8m an hlawh chhuak a, kum hmasa lam aiin £54.93m (57.9 per cent) in a tam zawk.

London club hian sum ṭhahnem tak lalut mah se league lama elpui club panga dang erawh an pha lo. Manchester United chuan pound maktaduai 581.2 la lutin sum an hui lut hnem ber a, Man City (£473.4m), Arsenal (£422.8m), Liverpool (£364m) leh Chelsea (£361.3) ten dawtin Spurs hi paruknaah an awm.