I League champion Minerva an tla
ISL club Jamshedpur FC chuan I League champion Minerva Punjab chu AIFF Super Cup aṭangin an pet chhuak. Mizo club Aizawl FC-in match hmasa berah ISL champion Chennaiyin FC an pet chhuah tawh avangin quarterfinal-ah league champion pahnih an awm tawh lo.
Thawhṭanni zana Kalinga Stadium, Bhubaneswar-a inkhelah hian hun pangngai leh extra time-ah Minerva leh Jamshedpur ten goal an khung thei lo ve ve a, penalty shootout-ah pawh vawi sarih an pet hnuah ISL club 5-4 in an vannei ta zawk a ni.
Keeper che ṭha
Inkhelh ṭantirh lam a nung lo a, hmuhnawm thlir tur a vang. Minute 15 hnu lamah a ziaawm chho a, Minerva tana William Opoku chance neih hmasak ber chu veteran keeper Subrata Paul aia lut Sanjiban Ghosh-a'n a dang ṭha hle.
Jamshedpur lamin counter attack hmangin ṭum hnih a zawn zatin an chhu let a, Punjab goalie Kiran Limbu-a'n a hmasa zawk dangin a pahnihna erawh Bikash Jairu-a'n crossbar a pet per. Halftime hma hretin Minerva player Akash Sangwan goal khung tur chu Sanjiban Ghosh-a'n a dan sak.
Second half-ah pawh Akash Sangwan freekick pet chu Sanjiban Ghosh bawkin a dan sak a, Jamshedpur tan Bikash Jairu pawhin chance ṭha a hlah bawk. Minerva forward Chencho Gyelthsen pawhin goal a khung thei lo a, hun pangngai leh extra time-ah goal a lut lo.
Penalty chu
Jamshedpur tan Kervens Belfort leh Wellington Priori ten an khung nghal a, Minerva tan William Opoku leh Eric Dano ten an khung ve ve bawk. Pathumnaa pen chhuak Memo-a'n JFC tan a hlah a, Punjab club tan Moinuddin Khan-a'n a hlah ve bawk.
Jamshedpur tan André Bikey leh Sumeet Passi ten an khung ve ve a, Punjab club tan Akashdeep Singh leh Kamalpreet Singh ten khung ve bawkin vawi nga pet zawhah 4-4 a ni.
Sudden death-ah Jamshedpur midfielder Bikash Jairu-a'n a hlah a, penalty dangtu Kiran Limbu chuan pet nghalin Minerva-in chakna hun ṭha an nei a, amaherawhchu goalkeeper pet hi JFC keeper Sanjiban-a'n a dan sak. Jamshedpur tan tawnhriat nei ṭha Mehtab a rawn pen chhuak a, cool takin goal laiah tak a pet a, keeper Kiran Limbu a bum.
Jamshedpur tan keeper Sanjiban a che ṭha chhunzawm a, Bali Gagandeep pet dangin ISL club 5-4 in an chak.
Coppell a ngaihdan
Jamshedpur coach Steve Coppell chuan, "Thuneitu hian dan hi ennawn leh se minute 90 hnuah hi chuan penalty shootout ni nghal se a duhawm hle. Minute 90 hnuah chuan tha a awm tawh lo a, inhliam a awlsam bik a, a tuartu chu club bawk an ni," tiin inelna kalphung thlak se a duh thu a sawi.
English coach Coppell chuan, "Sanjiban Ghosh hi kum tluanin Subrata hnuaiah a inzir a, zaninah a thawhrim rah a seng ta a ni. A vawi khat chance neihna a ni a, a khel ṭha takzet a ni," tiin hnehna chanpuitu a keeper a fak.
Engtin zel?
Zanin hian Super Cup hi khelh chhunzawm a ni dawn a, Pune City leh Shillong Lajong te an inkhel ang. Naktuk zan hian East Bengal leh Mumbai City te an inkhel dawn bawk a, heta chak zawk hi quarterfinal-a Aizawl FC hmachhawn tur an ni.
Mizo club hi tunah chuan Guwahati-ah AFC Cup khel turin Guwahati-ah an awm leh tawh a, Ningani zan dar 6:30 hian Bengaluru FC nen Indira Gandhi Athletic Stadium-ah an inhmachhawn ang. Aizawl FC-in Guwahati-a home match an khelh chhan hi Mizoram chhungah AFC Cup khelh theihna tur stadium a awm loh vang a ni.