IBF thuchhuah Joshua tan danglamna?

International Boxing Federation chuan heavyweight boxer pahnih Dillian Whyte leh Kubrat Pulev chu inhmachhawn turin thu a pe niin Whyte-a promoter Eddie Hearn chuan a sawi a, he inhneka chak zawk hian champion lai Anthony Joshua hmachhawnna hun ṭha an nei thei ang.

Hetiang a nih takah chuan WBC champion Deontay Wilder hmachhawn tura sawi Joshua dinhmun a chiang lo sawt a, British boxer hian a IBF kawnghren kawl lai humhim turin Whyte leh Pulev inhneka chak zawk a tum ngei a ngai dawn a, a hmachhawn duh lo a nih chuan a IBF kawnghren a kalsan a ngai ang.

Hearn chuan, "IBF aṭangin Whyte leh Pulev inhnek tir turin lehkha kan dawng a ni," tiin twitter lamah a ziak a, "Heavyweight tan chanchin lawmawm a ni," a ti bawk.

Joshua leh Wilder inhnek hmuh châk te tan erawh chanchin lawmawm a ni lo. IBF duhdana a kaltluang a nih chuan Wilder hian a nghah hret a ngai dawn tihna a ni a, heavyweight-a title lian pali WBO, WBA, IBF leh WBC kawl vek thei awmchhun kan hmu lawk dawn lo tihna a ni bawk.

WBO leh WBA champion ni tel Joshua hian kum 2015 khan Whyte hi a lo knockout daih tawh a, October khan Pulev nen inhnek tum mah se Bulgarian boxer hi a dar hliam vangin a inhnukdawk bawk.