Chak mamawh TNT leh ITI inlan dawn

Tualchhung volleyball sulhnu nei ṭha TNT chuan zanin dar 8:00 hian R. Dengṭhuama Hall-ah ITI Veng an hmachhawn dawn a, a vawi khat nana Pro Volleyball League nomawi chawi an tumna kawngah hnehna chan an mamawh.

PVL-ah Indian player ṭha an inlan fo a, kuminah pawh hmuh tur an awm nual. Zanin inkhel tur TNT leh ITI erawh Mizo hlanga khel awmchhun an ni a, hei hian a hmuhnawmna a ti nep chuang lo ang.

TNT-in an match hnu­hnung berah Hunthar Veng an hneh lo, champion lai Hunthar nen vawi thum an intawn tawhah chak ni hmel an la hmu ve lo, tun season-a an chak loh dan erawh vanduai vang a ni - set nga an khelh hnuah an tlawm.

Semifinal lut turin TNT tan chak a ngai a, Hunthar an hneh lohna rilru na thawidam nan hnehna chan a pawimawh bawk. Anastasia an hneh ṭuma che ṭha tak Lalramnunfela bakah Vanlalchhantluanga Sailo leh Lallungmuana te an pawimawh ang.

Mizoram Volleyball Asso­ciation hnuaia inelna sang ber PVL-ah a vawi khat nan ITI an inlan a, volleyball ngaina veng hian tawnhriat an la neih tam loh a vangin beisei ang result an la nei thei lo; match hnih an khelh tawhah an tlawm ve ve a ni.

ITI-in Hunthar lakah beisei awm takin bul an ṭan a, mahse Durtlang North lakah beisei an phak lo zui. ITI tan hian captain C. Lalnunpuia leh a hmingpui Nunpuia te bakah Lalnuntluanga Renthlei leh C. Lalremruata ten inelna hniam lama an theihna an lantir tawh ang kha PVL-ah an lantir a ngai tawh ang.