Goal Ropui khungtu Ronaldo

Hun rei lote chhung chu a reh ṭhap a, inkhel entu mipuiin an thil hmuh chu mak an ti a, awih har an ti a, hmuhnawm an ti bawk. An thil hmuh chu Cristiano Ronaldo-a'n boruaka invawrhin Juventus lamah goal ropui a khung.

Giorgio Chiellini leh Gianluigi Buffon te inhmu fuh loin Italian defender ball petchhuah na tawk lo chu Ronaldo-a'n a chang a, Lucas Vazquez pein Real midfielder ball pet hi Juve keeper Buffon-a'n a hnek chhuak.

Dinglama awm Dani Carvajal chuan chang lehin box chhungah a cross a, Ronaldo chuan ball a hmuh rualin sang takah a invawrh a, boruakah rei lote tangin a ke dinglam chuan ball chu goal-ah a bin lut a, Buffon meuh pawhin en liam mai loh chu tihtur a nei lo.

Goal-a mawi tluk zetin mipui chet dan pawh a mawi a, Real Madrid ṭantu chauh ni loin Juventus ṭantu thlengin Ronaldo goal khung lawmin an ding a, kut an beng.

Kum 33 mi ni tawh mah se Ronaldo-a'n goal khung bansan a la tum lo a, ram leh club tan match hnuhnung 14-ah goal 25 a khung tawh. Champions League bikah tun season match zawng zawngah goal a la khung vek a, goal 14 khung tawhin Golden Boot dawng thei tur zinga hmahruaitu a ni.

Juventus manager Massimiliano Allegri chuan, "Football chanchina goal ropui ber a ni em tih chu ka hre lo a, goal ṭha chungchuang bik a ni tih chu ka chiang. Keini chuan tuna a thiltih lawmpui mai loh chu tih theih kan nei lo," tiin goal chungchang a sawi.

Juve goalkeeper Gianluigi Buffon chuan, "Ronaldo khelh ṭhat ber ṭum a ni pawhin ka hre lo. Ronaldo kan hmuh ṭhin ang tho kha a ni. Ani leh Messi te hi chu season tina an hnathawh avang hian Maradona leh Pele te nen pawha khaikhin theih an ni," tiin goal khungtu a dah sang hle.

Ronaldo chuan, "Goal ropui a ni a, han sawi belh ngaihna pawh ka hre lo. Khatiang ang goal kha chu khung theih ka inbeisei lo. Juventus ṭantute chungah ka lawm a, ka khingpui supporter-ten tun hmain goal khung min la lawmpui ngai lo," tiin a beisei phak bakin thil a thlen thu a sawi.

Real Madrid manager Zinedine Zidane erawhin 2002 Champions League final-a chakna goal a khung nen an khaikhin tir a, France legend chuan, "Ka goal khung le," tiin a chhang.

Zidane chuan sawi chhunzawmin, "Goal mawi lam hi teh thiam a harsa a, Ronaldo hian goal ṭha bik hi a khung fo a, inelna sangah hei aia ṭha hi a khung kher bik lo. Football inelnaa goal ṭha ber zinga mi a ni.

"Ronaldo hi chu a dang hlak a, engtik lai pawhin Champions League-ah ṭha bika khel turin a la tui hal a. A hming ṭhat tawhna hmachhuana chawlh hahdam mai hi a tum lo," tiin a player a fak.

Ronaldo hoin Real-in Juventus Stadium luhchhuah
Thawhlehni zan Champions League quarterfinal first leg-ah Real Madrid chuan Juventus 3-0 in an hneh a, Cristiano Ronaldo chuan goal hnih khungin Marcelo goal khung tur a siam sak bawk. Santiago Bernabeu-ah April 11 zan khian second leg khelh a ni dawn a, semifinal lut turin champion lai Real dinhmun a ṭha hle.

Juventus harsatna belhchhah turin Paulo Dybala chuan minute 66-naah Dani Carvajal ball tauh tur a chuhpuina lamah a tlawh a, yellow card vawi hnih a hmuhna chiah niin hnawhchhuah a ni a, second leg-ah a inlan ve thei lo ang.

Ronaldo bawk
Nikum Champions League final rematch-ah Cardiff-a man of the match-a thlan Ronaldo bawk a langsar leh a, minute thumna lekah Isco cross chu nang hmasa berin goal-ah a chantir nghal a, Champions League-a match 10 a zawna goal khung thei hmasa ber a ni.

Italian club hian first half-ah siphurh sut theihna hun ṭha a nei a, chutihrualin Toni Kroos chuan yard 25 aṭangin crossbar a tih per bawk. Second half minute 64-naah Ronaldo-a'n goal ropui a khung a, minute hnih hnuah Dybala hnawhchhuah a nih avangin Juventus hmabak a harsa sawt.

Minute 72-naah passing mawi tak hmangin Real-in Juventus tlarhnung an ṭhiat a, Marcelo-a'n Ronaldo nena wall pass an neih hnuah Buffon paltlang lehin goal thumna a khung. Spanish club-in khualmualah 3-0 in hnehna an chang a, chutihrualin first half-ah keeper Keylor Navas-a'n ṭha takin Gonzalo Higuain-a goal khung tur dang sak lo se chuan result a dang thei hial ang.

Engtin zel?
Real Madrid-in La Liga match 30 aṭangin point 63 an hmu a, Barcelona point 13 zeta an phak tawh loh avangin champion a beiseiawm tawh lo a, Zinedine Zidane-a dinhmun thlengin a derthawng. Amaherawhchu, Champions League-ah Spanish club hi an che ṭha a, Zidane-a hnuaia kum thum a zawna champion thei dinhmunah an ding mek.

Real captain Sergio Ramos chuan, "Kan tum ang thlapin kan khelh chhuak a, kan vai thawhrah a ni. Tunah chuan kan hna zo turin kan mualah kan let ang. Minute 90 dang khelh tur kan la neih avangin kan la zo lo," tiin hmabak an la neih thu a sawi.

Spanish club hian February 1962 hnuaia a vawi khat nan Juventus mualah hnehna an chang a, hemi hma hian Juve mualah match sarih khel tawhin chak an nei lo. Zidane-a hote tan tuna an hnehna hi Pathiannia Atletico Madrid nen derby match an khelhna tur atan infuihna ṭha tak a ni dawn a, Juventus pawhin insiam ṭhatna hun ṭha neiin Inrinni zan hian Serie A mawngphah Benevento an hmachhawn ang.