Bengaluru hmaah Aizawl FC fiahna

Indian Super League cham­pion Chennaiyin FC hneh­tu Aizawl FC chuan zanin dar 6:30 hian AFC Cup group stage-ah ISL finalist Benga­luru FC an hmachhawn dawn.

An inkhelhna hmun tur hi Indira Gandhi Athletic Stadium, Guwahati a ni a, Assam khawpuia 'home match' an khelh a ngaih chhan hi Asian khawmualpui inelna thleng thei khawp stadium Mizoramina la nei loh vang a ni a, India hmar chhaka awm chhun chu Guwahati hi a ni.

Inelna chu
Asia khawmualpuia club inelna sang ber chu AFC Cham­pions League a ni a, Aizawl FC pawhin playoff khelin inel­na tak erawh an inpettling zo lo.

Tuna Mizo club khelhna AFC Cup hi Asian club-te tana inelna sang ber dawttu a ni a, Aizawl FC hian group stage hi an pel lo a nih pawhin a thlen chin hi a sang hle.

Santosh Kashyap-a hote hi Group E-ah Federation Cup champion Bengaluru FC bakah Maldives club New Radiant FC leh Bangladesh club Abahani Limited nen an awm ho a, team pakhat tan chauh inter zone playoff semifinal luh theih a ni.

Mizo club dinhmun
Aizawl FC hian an match hmasa berah Lalram­hmunmawia goal hmangin New Radiant lam­ah khung hmasa mah se Male-ah mualneitu hian goal thumin an chhang let a, goal khung­tu Tea hi hnawhchhuah a ni.

Group E-ah New Radiant hi point ruk hmuin hmahruaitu an ni a, Mizo club khingpui tur Bengaluru hian Daniel Lalhlimpuia goal hmangin Abahani hnehin point thum an hmu ve tawh a, MPL club erawhin point an la hmu lo.

A harsa dawn
Santosh Kashyap chuan, "AFC Cup-ah Kimkima leh MK-a te kan chhawr thei lo a, Bengaluru nen hian hrem vangin Tea kan hmang thei dawn lo. A harsa dawn tih kan hria a, chutih rualin kan tum chu kan khelh apianga theihtawp chhuah hi a ni a. Chhuantea leh Rozama te tan hun ṭha a awm thei ang," tiin an player neih ang hman thiam a ṭul tur thu a sawi.

Santosh chuan, "Bengaluru hi team ṭha ber zinga mi an ni a, an squad a chhah ṭhat avangin player siksawi kual pawh ni se team ṭha tak an chhawr thei zel. Amaherawhchu knockout stage thlen beiseina kan la nei a, chak tumin kan khel ang," tiin an hlauh bik loh thu a sawi.

Khualmualah 'home match'
AFC Cup group stage thleng thei khelmual Aizawl ah a awm lo a, Mizoram aṭanga hnai ber Guwahati-ah khelh a ṭul phah. Artificial turf hman phal a ni lo a, natural grass-a khelh a ngai a, hei bakah hian tehna (criteria) hrang hranga tehin India hmar chhakah Guwahati-a IG Stadium chiah hi a tling.

Santosh chuan, "Mizoram ngeia khelh a châkawm a, entu mipui kan team danglamna a ni. Chutihrualin Guwahati-ah pawh ni se ṭantu kan nei ṭha leh tho ang. Male-ah pawh ṭantu kan nei ṭha a, Bhubaneswar-ah pawh ṭantu kan nei ṭha leh tho a, chuvangin Mizo mipui chungah hian ka lawm em em a ni," tiin Vanglaini a hrilh.

Nomawi beisei BFC
Bengaluru FC-in ISL no­mawi an chawi tak loh avangin beisei an la neihna AFC Cup leh Super Cup-ah thapui an la chhuah dawn. Blues hian ISL league round an thunun a, an result thlirin tun season-a Indian club khel ṭha ber anga sawi theih an ni a, chutihrualin Gokulam Kerala 2-1 a an lehthal hram avangin chesual thei an ni.

Blues coach Albert Roca chuan, "Aizawl FC-in Chen­naiy­in an hneh kha ISL club tana inven lawkna ṭha tak a ni," tiin an fimkhur phah thu a sawi a, Benglaru FC hian nomawi chawi loa season hman tluan an duh dawn loh avangin AFC Cup leh Super Cup te an la thutak khawp ang.

Blues an chungnung
Aizawl FC leh Bengaluru FC-te hi vawi sarih zet an inhmachhawn tawh a, vawi khat inhnehtawkin Blues hi vawi li an chak a, Mizo club hi vawi hnih an chak tawh.

Bengaluru hi chungnung mah se minute 90 chhungin chungnung fâl an awm ngai lo a, goal khat aia tama chak an la awm lo. Mizo club hian I League-a Bengaluru FC cham­pion hlimah Federation Cup-ah an pet chhuak nghal a, league nomawi an chhuhsak bawk.