Sevilla mualah Ribery a langsar

Bayern Munich chuan Cham­pions League semifinal an hnaih ta. Thawhlehni zan quarterfinal first leg inkhelah Bayern hian Sevilla chu 2-1 in an luhchhuah a, goal hnih an khung theih nan Franck Ribery chu player langsar a ni.

Ramon Sanchez Pizjuan Sta­dium-a inkhelah Sevilla midfielder Pablo Sarabia-a'n minute 32-naah goal hmahruai a khung a, last 16-a Manchester United pet chhuaktu Spanish club an vannei nawn leh dawn niin a lang hman.

Amaherawhchu, German club tan kum 34 mi Ribery a la tar lo. France international hlui hian box chhungah lalutin, lei hrula a cross chu Jesus Navas-a'n anmahni lamah a tilut palh a, 1-1 in chawlhlawk an hmang.

Seconad half-ah pawh Ribery bawk a hnawksak, mual sir lamah ball hlauhawm tak takin a tlanpui fo a, minute 68-naah fal taka ball changin mual sir lehlama awm Thiago Alcantara tauh luh turin a siamsak a, khual­mualah hnehna an chang.

Bayern an fawr
Khualmualah Bayern-in goal an chhuah hmasa a, first half chhungin midfielder Arturo Vidal chu hliam vangin an chan a, a thlak turin James Rodriguez dah luh a nih hnuah hliam vang bawkin Juan Bernat thlak a ngai leh.

Goal an phurh hmasak hnuah player pawimawh pahnih an chan bawk a, mah se Bundesliga champion hian huaisen takain an bei let a - a hnuaihnung zawk an nih lai pawhin an buai phah lo, ropui takin an tho chhuak thei a ni.

Jupp Heynckes-a'n nikum October thla khan a vawi thum nan Bayern Munich hi a enkawl leh ṭan a, treble champion nih puitu manager hian Champions League bikah a zawnin match 12 chhung hnehna a chanpui tawh.

German manager kaih­hruaina hnuaiah hian a zawna a vawi nga nan league nomawi pawh an chawi leh ngei dawn niin a lang. Inrinni zan hian Allianz Arena-ah Augsburg an mikhual dawn a, hnehna an chang a nih chuan an champion ang - April 11 zana UCL second leg an khelh tur atana inbuatsaihna ṭha tak a ni ang.

A awlsam lo
Bayern Munich defender Mats Hummels chuan hnehna an chang nachungin a awlsam loh thu a sawi a, dinhmun himah an lawm bik loh thu a sawi bawk.

Germany international Hum­mels chuan, "Inkhel tir lam­ah kha chuan Sevilla inkhel kan en a ni ringawt a, goal kan chhuah hnuah insiamṭhat kan ngai tih kan hre chhuak thar. Coach-in kan khingpuite team ṭha an nihzia leh a ven dan min hrilh a, chumi hnuah hma kan sawn," tiin a sawi.

Kum 72 mi Heynckes pawhin hmasawn an mamawh thu sawiin, "Ball kan hloh hnem a, midfield a khawng tawk loh bawk avangin kan khingpui ten hun ṭha an neih phah. Goal kan phurh hnua kan sut vat theih avangin a lawmawm a, chutihrualin kan khelmuala inkhel tur ni mah ila hmasawn kan ngai," a ti.

Beisei a la awm
Sevilla-in a vawi khat nan Champions League quarterfinal an khel a, a thiam pali zinga in­hlangkai tur erawh chuan vanneih­na an mamawh tel tawh dawn. Bayern hian European football-ah khualmuala hnehna an chan tawhna vawi 16-ah vawi khat chiah round sang zawk luh loh an nei.

Vincenzo Montella naute hian Anfield-ah Liverpool an inhnehtawkpui a, Jose Mourinho kaihhruaina hnuaia khel Man­chester United an pet chhuak thei bawk. Bayern lakah an goal venghim ṭha viau mah se an vannei tluan thei bik lo a, an vanneih ṭum chu nise German club lian chelh thei tur khawpin an thawkrim.

Sevilla manager Montella chuan, "Team ṭha tak lakah ka nauten an khel ṭha em em a, vanneihna kan neih loh vang chauha chak lo kan ni. Taksa bakah rilru a paukhauh ṭha a, hun tawp lamah goal khung tumin nawr viau mah ila kan khung thei tlat lo kha a mak a ni. Munich-ah pawh tuna kan huaisenna ang bawk kan neih leh ka beisei," tiin a sawi.