Serpents-in VR4 an barakhaih

Thawhlehni zan khan Mizoram Super League Season 5 khel tur zawnna playoff chu khelh a ni a, game 1-ah Zarkawt Serpents chuan overtime-ah Republic VR4 chu 86-80 in an hneh.

Zanin dar 8:00 hian Hawla Indoor Stadium-ah game 2 khelh a ni dawn a, Serpents-in MSL-a kir turin vawi khat chak chiah an mamawh tawh.

ADBBA champion Serpents hian MSL5 quali-fying-ah BC Bethlehem an hneh lo a, pahnihna an nih avangin MSL4 relegation playoff-a Hollow BBSP hnehtu VR4 nen Mizoram basketball inelna sang ber khel tur an zawn a ṭul phah ta a ni.

Game 1-ah MSL khel zo hlim VR4-in hun tam zawk an thunun a, quarter 3-na khelh zawhah 66-51 in hma an hruai a, chak tura ngaih an ni tawh. Tualchhung basketball-a inlehthalna ropui ber zinga chhiar tel tawh tur a thleng a, quarter tawp berah Serpents hian 18-3 in an hneh let a, overtime thlengin 86-80 in hnehna an chang zui.

Zarkawt Serpents coach Michael Lalchhuan-awma chuan, "Kan lehthal leh theih kan beisei ngam chiah lo a, amaherawhchu quarter lina ṭantirha kan chet ṭhat avang khan beiseina min pe a ni," tiin a sawi a, MSL khelh leh theih an inbeisei thu Vanglaini a hrilh bawk.

VR4 hian MSL-ah Khatla TBL leh Tuikual South laka hma an hruai hnuah an inpawhthlak tir tawh a, team nem zawk lakah pawh an la insiam ṭhat theih loh avangin tho chhuak turin zanina chak ngei ngei a ṭul tawh.