Arsenal mikhual tur CSKA Moscow
Zanin dar 12:15-ah Europa League quarterfinal match pali khelh rual a ni dawn a, Premier League club Arsenal chuan CSKA Moscow an mikhual dawn. Champions League aṭang tla Atletico Madrid leh RB Leipzig te pawhin mikhual an thleng ve bawk ang.
Europa League champion hian season tharah Champions League an khel dawn a, hei vang hian league lama che ṭha lo Arsenal leh Lazio te tan a pawimawh zual. Leipzig tan hming chher theihna hun niin, Atletico Madrid tan nomawi nena season khar theihna tur a ni bawk.
Ze ngai
Premier League-a parukna nilai Arsenal tan palina nih phak a beiseiawm tawh lo a, pangana Chelsea erawh umphak theih tur an la ni. Arsene Wenger-a kaihhruaina hnuaiah Arsenal hian a vawi khat nan UCL an khel phak lo–Europe club liante inelna sang bera inlan loh zawn an duh lo ang.
Arsenal hian season bul an hmangṭha tlangpui a, a laihawlah an zuih ṭhin. Kuminah pawh an ze ngai hi an la kalsan thei lo, kum dang ang bawkin thil a la danglam chuang lo. An tih ṭhin dan bawkin dinhmun ṭha lo taka an din hnuah an tho chhuak mek a, an match hnuhnung berah Stoke City an hneh chiah khan nikum October thla hnua a vawi khat nan a zawnin vawi li hnehna an chang ve leh ta.
Season hmasa pawh khan January thla leh April thla inkarah an match 10 zinga vawi kua zet hnehna an chang thei a, league bakah FA Cup final-ah Chelsea hnehin nomawi an chawi bawk. Amaherawhchu, league-ah palina an ni phak chuang lo a, kuminah pawh insiamṭhat nan a tlai tawh–UCL khel tur chuan Europa League nomawi an mamawh.
A pawimawh
Inelna tir lamah kha chuan Arsene Wenger-a'n player naupang leh tawnhriat nei tlem zawkte khelhtir nan a hmang a, harsa lo takin group stage an paltlang tho. Mahse, knock out stage chinah erawh a neih ṭhat ber a chhawr a, zaninah pawh a dang chuang lo ang.
An match hnuhnung bera Stoke an hneh ṭumin Laurent Koscielny chu bench-ah chawlhtir a ni a, France international hian zaninah bul a ṭan ang. Armenian international Henrikh Mkhitaryan pawhin bul a ṭan tawh ang a, tun hnaia khel ṭha tak Mesut Ozil leh Aaron Ramsey te an awm bawk.
Arsenal hian Danny Welbeck chiah striker senior chhawr tur nei chungin AC Milan an sawp thei a, zaninah erawh Alexandre Lacazette a inkhel thei tawh dawn. Lyon stiker hlui hi khup hliam vanga a chawlh reng hnuah a rawn kir tawh a, Stoke lakah goal hmangin a dam zia a puang tawh.
Zuam sual theih
Russian club CSKA Moscow hi Champions League group stage paltlang zo lo mah se, Red Star Belgrade leh Lyon hnehin quarterfinal hi an lut a, Russian Premier League-a pathumna nilai hian zaninah pawh inrintawkna an nei sang ang.
2006-07 Champions League group stage-ah team pahnihte hi an intawng tawh, Emirates Stadium-ah goal awm loa an inhnehtawk hnuah Moscow-ah si khat faiin Gunners an tlawm. English club tan mahni muala goal khung a pawimawh dawn hle a ni.
Rinkai Atletico
Atletico Madrid-in Lokomotiv Moscow sawp chungin quarterfinal an lut a, zaninah pawh La Liga pahnihna nilai hi an khingpui tur Sporting Lisbon lakah pawh rinkai zawk an ni leh bawk. Spanish club hian an khelmual thar Wanda Metropolitano-ah a zawnin match riat chhung goal chhuah loin an kaltluang tawh a ni.
Hrem vangin Antoine Griezmann-a'n hrem vangin Deportivo La Coruna a hmachhawn thei lo a, zaninah erawh tha tharin a inlan ang–France international forward inlan thei tur hi Diego Simeone-a tan chanchin lawmawm tak a ni ngei ang.
Atletico leh Lisbon te hi tun hmain Europa League last 16-ah an intawng tawh, inkhel pahnih belhkhawmah 2-2 chiah a ni a, away goal rule hmangin Spanish club hi an tlang.