ATK an tlawm; Keane a chawl dawn?

Indian Super Cup-ah ATK an tla nghal. ISL-a pakuana dinhmun an luah avanga qualifier khel hmasa team hian last 16-ah FC Goa an hmachhawn a, 3-1 in an tlawm. Nizan khan Pune City leh Shillong Lajong an inkhel zui a, he thu buatsaih a nih lai hian result kan hre hman lo.

FC Goa tan ISL top scorer Ferran Corominas, Hugo Boumous leh Brandon Fernandes ten goal khat ṭheuh an khung a, ATK tana Robbie Keane goal khat khungin awmzia a nei thui lo. April 12-ah Goa-in quarterfinal an khel lehnghal dawn a, I League champion puitu Minerva Punjab pet chhuaktu Jamshedpur FC an hmachhawn ang.

Inkhelh zawha sawi zui hlawh ber erawh ATK tlawm chungchang a ni lo a, Tottenham Hotspur striker hlui Robbie Keane-a'n inkhelh a chawlhsan dawn leh dawn loh chungchang zawk a ni.

Manager nih duh
ATK-in ISL-ah beisei an phak lo a, season laihawla Teddy Sheringham an ban hnuah technical director Ashley Westwood chuan a enkawl lailawk. Bengaluru FC boss hlui hnuaiah pawh eng ruai an an loh avangin Keane chu player manager tura ruat a ni.

Tottenham striker hlui hian league match tawp ber, Super Cup qualifier leh Thawhlehni zan inkhelah ATK hi a enkawl a, vawi hnih hnehna chanpuiin Goa laka an chak loh hi a tlawm awmchhun a ni–Irish striker chuan manager nih zawm a duh thu a sawi.

Ireland tan match 146-a inlana goal 68 khungtu striker chuan, "Manager hna rei lote ka thawh chhungin nuam ka ti em em a, ka hma hun zelah pawh manager nih ka duh thu hi ka zep ngai lo," a ti.

Ngainatawm football
Liverpool striker hlui Keane hi kum 37 mi a ni tawh a, a ball boot khai lam a sawi ri a nih pawhin a mak lo ang. Mahse, ISL khel tawh zinga player langsar ber pawl chuan, "Tun hi ka hma hun sawi hun niin ka hre lo," a ti a, thuchiang a nei lo.

Keane chuan sawi zawmin, "Hahchawlhna hun ka insiam ang a, uluk taka ngaihtuahna seng chungin ka kawng zawh tur lamah thutlukna ka siam ang. Manager nih ngei erawh ka duh a, coaching pawh ka zir vek tawh a ni," a ti.

Tottenham Hotspur Player of the Year-a ṭum thum lai thlan lo ni tawh player hian hliam vangin ATK tan a inlan tam thei lo. Mahse, Kolkata club tana match 11 a khelhah erawh goal riat a khung tho a, a che chhe lo.

Hmasawnna tur
Major League Soccer-ah Keane-a'n season ruk chhung hun a hmang a, USA-a hun a hman chhungin LA Galaxy tan hming a chher hle–MLS XI-ah vawi li a lang thei a, LA Galaxy Most Valuable Player-ah ṭum li a lang bawk.

Keane chuan, "ISL-ah thil ṭha tam tak hmuh tur a awm ngei a, mahse hmasawnna tur hi a la tam zawk a ni. ISL-in a tih leh tih loh tur hrilh turin engmah ka ni lo a, MLS nen kan khaikhin dawn a nih erawh chuan MLS chuan hmasawn an ngaihna laiah hman an sawn zel.

"Kan hriat reng tur erawh ISL hi a la inṭan dawn chauh a ni a, a season lina chauh a la ni. Mahse, top league ni tur chuan tun aṭang hian insiamṭhat ngaihna lai tam tak a awm a ni," a ti.

Entu tlem
ATK-in season tluanin an khelmualah entu mipui 114,021 bak an nei lo a, entu an tlem ber ṭumin mi 3,165 chiahin an en! Keane chuan football-in hma a sawn dawn chuan inkhel entu an tam a ṭul thu a sawi a, stadium ruak deuhthawa khelh fo chu hrehawm a ti!

Inter Milan leh Leeds United tan pawha lo khel tawh striker chuan, "Fans sing tel pungkhawm hmaa inkhelh kha ka chak em em a, mahse chutiang chu a thleng si lo. Stadium khat veka mipui an punkhawm ṭum chu khualmuala Kerala Blasters kan tlawh chiah kha a ni a, a bakah chuan a ruak deuhthaw a ni zel.

"Indian kalphunga buaithlak chu kan chak loh tluana ṭawiawmtu fans an awm lo kha a ni. Fans tam zawkin inkhel an en theihna tur ringawt pawhin hmalakna tur tam tak a awm. Chutihrualin ISL-ah hian player ṭha tak tak an tam a, he league hian hma a sawn zel ka duhsak a ni," a ti.

Beiseiawm Hitesh
Indian football-a hmabak nei eng ber pawla an sawi chu Hitesh Sharma a ni a, kum 20 mi midfielder hian Mumbai FC aṭanga a hming chher ṭanin tun season-ah a vawi khat nan ISL a khel a, Keane te nen ATK-ah an awm ho.

Keane chuan, "Hitesh hi player ṭha tak a ni a, hmabak nei eng tak a ni. Ball a keng nghet a, a inringtawk em em bawk. Qualifier-ah khan goal ropui tak a khung a, Goa lakah pawh a khel ṭha a ni," a ti.

West Ham tan pawha khel tawh striker chuan,"Eugeneson Lyngdoh kan chhawr thei lo kha kan tuar a ni," tiin Khasi midfielder tel loa ISL-a an ṭhat tawk loh thu a sawi. Eugene hian hliam vangin tun season-ah league match thum chiah a khel