Gopichand hna an pawt sei

Badminton Association of India president thar Himanta Biswa Sarma chuan a hmalakna tur langsar a sawi a, chief national coach nilai Pullela Gopichand chu kum li dang a hna ngai thawk chhunzawm turin a ti.

Kum 44 mi Gopichand hian 2006 aṭangin national coach hna a chelh ṭan a, a kaihhruaina hnuaiah hmasawna a kal chak hle. Indian shuttler ten khawvel player ṭha dang an elphak tawh a, inelna lian leh ngaihhlut Olympic hnuhnung pahnihah pawh medal lak a ni.

Gopichand bakah hian junior national coach Sanjay Mishra chuan kum 2022 thleng a hna a thawk chhunzawm dawn bawk–anni pahnih kaihhruaina hnuaiah Indian player te an inzir chhunzawm leh ang.

BAI president thar Sarma chuan, "Tunah hian Indian badminton hian hun pawimawh a tawng chho mek a, kan player-te hian an theihna sang tak an lanchhuah tir theih nan puih kan duh a ni. State association tih chak a, inzirna hmun buatsaih kan duh. Kan hma kum li lo awm tura kan hmalakna tur hrang hrang duang turin executive committee ṭhutkhawm neih a ni ang," tiin a sawi.