Nou Camp boruak zo lo Roma
Luis Suarez-a'n Barcelona chu UEFA Champions League semifinal lut turin hmun himah a dah. Nilai zan khan Nou Camp-ah mikhual AS Roma chuan own goal ṭum hnih an nei a, Catalan club hian Italian club hi 3-1 in an hneh.
Semifinal second leg hi Rome-ah April 10 zan khian khelh leh tur a ni a, amaherawhchu kum khat chuang Champions League-a goal khung tawh lo Uruguayan forward Suarez chuan minute 87-naah Barca goal lina khungin Roma tan Barcelona lehthal a harsa tawh ang.
Barca puitu Roma
Nou Camp-ah Suarez goal khung chu offside vangin pawm a ni lo a, Lionel Messi pawhin Roma keeper Alisson Becker dah theih loh turin a pet thei lo a, Ivan Rakitic ball petin goal ban a per bawk.
Barcelona-in goal an mamawh a, an khingpui Roma aṭangin ṭanpuina a hmu. Minute 38-naah Andres Iniesta ball pek chu Messi-a'n a chan hmain Argentina captain vengtu Daniele De Rossi chuan an lamah a tlawh lut. Minute 55-naah Rakitic leh Messi te corner-ah ball inpein an ball cross luh chu Samuel Umtiti-a'n goal ban pet perin a per chu insa seng hman lo Kostas Manolas a per hnuah a lut.
Catalan club goal hmasa pahnih hi Roma player-te an khung sak a, chutihrualin goal neih phu khawpin an goal nawr a na. Minute 59-naah Suarez-a ball pet chu keeper Alisson-a'n man nghet zo loin awlsam takin Pique-a'n a khung. Goal thum an chhuah hnuah Italian club an ṭhangharh chauh a, Barca keeper Marc-Andre ter Stegen-a'n ṭum hnih save ṭha a neih hnuah minute 80-naa Dzeko goal khung tur erawh a dang thei lo.
Italian club hian away goal hlu tak khungin beiseina thar nei hman mah se minute 87-naah Suarez-a'n Roma defender tih per nang fuhin chiang zetin a pet goal. Chak tura rinkai Barcelona-in goal li an khung tak avangin first leg khelh zawhah semifinal thleng tawh ang hiala sawi thei an ni.
Roma an vanduai
Italian club-in an beisei ang result an hlawh chhuak lo a, an khelh dan enin goal li chhuah thei ni mah se goal khat chauh khung tur chu a ni lo. Goal la huh hauh hmain Roma striker Dzeko chu box chhungah Nelson Semedo-a'n hnung lam aṭangin a pal tlu a, referee Danny Makkelie-a'n a ngawih bo pui.
Goal hnih an phur hnuah box chhung chinah Barca defender Samuel Umtiti chuan Lorenzo Pellegrini a titlu a, referee-in penalty ni loin freekick a pe zawk a, goal lut se result nghawng pha thei tur a la ni.
Roma striker Dzeko chuan, "Penalty kha min pe se danglamna a thlen thei ang. Referee khan penalty min pe ngam tur khan huaisenna a mamawh. Quarterfinal thleng pha kan ni a, dik taka kan khel ham sak hi kan phu a ni. Rilru lamah Barca kan ngam loah ka ngai lo, anni anga team ṭha tum a, referee-in tihsual pakhat pawh a neih chuan keini tan chuan a harsa tawh a ni," tiin a sawi.
Barca an ṭha
Nou Camp-ah Roma an huang tau a, tun season-a Barcelona leh Messi khelh ṭhat loh ṭum ber ang hiala sawi theih a ni. Chutihrualin goal li ngawt an nei a, Ernesto Valverde hote hian Champions League bakah La Liga leh Copa del Rey-ah champion turin beiseina an la nei bawk.
Barca manager Valverde chuan, "Football-ah hi chuan tihsual a awm tur a ni a, kan khingpuite tihsual kan chang a, keini erawhin tihsual pumpelh dan kan zawng thung. Kan vaiin kan player-te dik thlapin khel se kan duh a, mahse coach tiamin kan duh angin thil a thleng vek thei lo," tiin Roma player-te'n own goal ṭum hnih an neih chu a hriatthiam pui thu a sawi.
Suarez goal pawimawhna sawi langin Barca boss chuan, "Goal kan khung avangin kan lawm a, chumi hnuah min nawr let a, an duh ang goal an hmu. Hei vang tak hian kan goal lina kha a hlu em em a ni," tiin a sawi.
Hetihlai hian goal khungtu pahnih Suarez leh Pique te chuan pressure an pek nasat avanga Roma-in own goal an neih thu an sawi a, chak an phu thu an sawi ve ve bawk.