BOOM! City tan heavy metal a ring mah mah!

Manchester City-in tun season transfer bazar-a sum an sen zat chu pound maktaduai 255.7 a ni a, an tlarhnung remphui nan ringawt pound maktaduai 212.7 an hmang.

Pep Guardiola-a'n team ṭha din turin tlarhnung ngaihthah a thiang lo tih a hria a, an buaina erawh City 'tlarhnung' an ṭha tih hre lotu an awm hi a ni. Liverpool chuan Nilaini zan khan Champions League quarterfinal first leg-ah an mikhual City chu 3-0 in an sawp a, he team hi tun season Premier League-a City hneh thei awmchhun an ni mek bawk.

Hmanlai Lal In ropui tak, uluk taka kulh ropui nena hual vel sipai huaisen rualin an su tlang ang maiin City tlarhnung chu sut hawn an ni a, Anfield aṭangin City-in hawn tur an nei lo–zahna chauh lo chu.

Min 31 a tawk
Liverpool-in City laka goal thum khung tura hun an mamawh zat chu minute 31 chauh a ni. Minute 12-na lekah Mohamed Salah hmuh turin a awm nghal a, Egyptian forward hian a hna ngai thawkin tun season-a a goal 38-na chu hmahruaina goal ni turin a khung–City tlarhnung a pherh hle.

City an insiamṭha hman lo. Goal an chhuah aṭangin minute riat a liam hman chauh a, goal hnihna an chhuah–Alex Oxlade-Chamberlain chuan yard 20 vel aṭangin am goal hnihna a khung a, Anfield-a pan hnua English midfielder hmasawnna hi Liverpool ṭantu tan chuan ngaihnawm a tling.

Technical line-ah Pep Guardiola a hawihai a, khawvela manager hlawh hnem ber hmelah buaina hmuh tur a awm–a belhchhah turin Sadio Mane chuan minute 31-naah an goal thumna a khung a, Salah ball cross aṭanga tauh lut turin Senegalese forward a zuang ṭha takzet.

Guardiola chungah Klopp
Barcelona boss hlui Pep-a chunga record nei ṭha ber chu Reds boss Jurgen Klopp a ni a, vawi 12 an intawnah German coach-in vawi ruk hnehna a chang–Nilaini zanah pawh thawnthu ngai rin nawnin a awm a, Pep-a 'style' in Klopp-a thluak a chelh lo a ni ber.

Klopp-a'n dan pangngaiin a naute a tlan tam tir a, City-in ball an chanin an hnaih chilh zung zung a, an che rang em em bawk–hei tak hi passing game 'champion' puitu Pep-a naute tan a harsa a, an game siamtu ber David Silva te meuh pawhin hmun awl an neih theih loh chuan City tan a buaithlak a ni.

Liverpool-in tlarhmaah eng team pawh ṭhiat turin Roberto Firmino, Salah leh Mane an ṭha tawk tih an pholang nawn a, Pep-a'n inkhelh hmaa, "Salah, Mane leh Firmino hi dan theih loh deuhthaw an ni," a tih chu a takin a tem nawn.

Pep-a duhthlanna
City ṭantuten Liverpool laka an result-ah chhuanlam tur an zawng dawn a nih chuan Pep Guardiola chu dem tur a ni. Catalan manager hian rin loh takin centre back Aymeric Laporte chu left back-ah a chhawr a, Everton lakah Laporte-a'n he position hi hneh takin chelh mah se Nilaini zana a hmachhawn erawh Salah a ni–a mualpho.

Raheem Sterling-a'n amah siam liantu Liverpool chhuahsana City a pan hnuah Anfield-a pan apiangin deusawh a hlawh ṭhin a, Pep-a'n English midfielder hi rilru lamah a talbuai hlauin Ilkay Gundogan a luhtir–tun season-a form em em Sterling thlan a ni lo hi a mak a, Gundogan khelh 'chhiatnain' Pep thutlukna dik tawk lo a nem nghet tel.

Hetihrual hian City tlarhnung chu dem kai loh theih an ni lo. Reds goal hmasa ber luhna kawngah Firmino pet chu Ederson-a'n dang mah se Kyle Walker-a'n Firmino a pe nawn a, Brazilian forward hian Salah tan a siam sak. James Milner-a'n City ball chan lai a chhuhsak hnuah City-in a duhthala pet turin Ox chu hmun awl an siamsak a, Walker leh Vincent Kompany ven kara Mane-a'n a tauh lut thei kha City tan in en nawnna tur a ni bawk.

City bus-in beih a tawk
Liverpool-in Man-chester City an mikhual hmain coach leh player-te phurtu bus chu Reds fan-ten an bei a, City boss Pep Guardiola chuan he thil thleng hi a hriatthiam loh thu a sawi. Merseyside Police-te chuan team pahnih intawn hma hian 'inkhel pangngai' a nih loh avangin inventhawn thil thuah team pahnih bus-te pawh an tlan ṭhinna kawng pangngaiah ni lo tlantir an nih tur thu an sawi a, buaina erawh a chhuak ta tho a ni.
Bayern Munich boss hlui Guardiola chuan, "Kum khat liam taah khan hetiang thil hi Dortmund-ah a lo thleng tawh a, Liverpool ang club ropui aṭang chuan hetiang hi ka beisei lo.

"Mahse, a nihna takah chuan mi pahnih pathum thil tih a ni mai a, club pumpui dem theih pawh a ni lo. Mahse, hetiang hi a thlen tawh loh erawh ka beisei. Football khel tura kal mai kan ni," a ti. Liverpool chuan he thil thleng avanga an inthiam loh thu thuchhuah siamin an puang tawh a, City hnenah ngaihdam an dil.

Inkhel Chhehvel
October 2014 hnuah Liverpool-in an mualah tlawm hmel an hmu lo a, match 15 an daih tawh (W10 D5)
October 2016-a Manchester United an hmachhawn hnuah a vawi khat nan City-in target-ah shot an nei lo.
Pep -a'n Klopp a hmachhawn hnuhnung parukah vawi khat chiah hnehna a chang.
Liverpool-in tun season Champions League-ah goal 31 khungin khung hnem ber an ni mek.
Salah-a'n tun season-a CL game kua a khelhah goal sarih khungin assist vawi hnih a nei.
James Milner-a'n tun season CL-ah assist vawi sarih a nei a, heti zat assist nei thei dang an awm lo.