Gold medal pakua a chhuak nghal

Commonwealth Games neih mekah nimin tlai thleng khan gold medal pakua sem chhuah a ni tawh. England chuan pathum dawngin hmahruaitu an ni rih a, inelna thlengtu Australia chuan gold pahnih la tawhin table-ah a chung ber dawtah an awm mek bawk.

Inelnaah hian ram 71 aṭangin infiammi 4,500 chuang an kalkhawm a, gold medal 275 inchuh tur a awm dawn, nimin thleng khan ram 11-in medal an la tawh. Inelna hi April 15 thleng neih a ni ang.

Mizo nula Lalremsiami telna hockey team chu an match hmasa berah Wales lakah 3-2 in an chak lo a, knockout a nih loh avangin beisei tur an la nei. Weighlifting huanga inlan tur Lalchhanhimi chuan April 9, Thawhṭanniah inelna a hmachhawn dawn a ni.