TNT an tho chhuak

Pro Volleyball League khelh mekah TNT talbuai dawnin lang mah se an insiamṭha nghal. Nilaini zan inkhelah TNT hian ITI Veng lakah set hloh loin hnehna an chang a, point sarih nei tawhin semifinal an hnaih zel.

R. Dengṭhuama Indoor Stadium, Mualpuia inkhelah Muanna Veng team hian 25-17, 25-18, 25-23 in hnehna an chang. Champion lai Hunthar Veng laka hnehna chang zo lo TNT-in inkhel an thunun hneh hle a, a tir aṭanga a tawp thlengin buai lai an nei lo.

Muanna Veng team tan Sadraka chuan point 18 hmuin vawi sarih a tisual a, RFL Plastics Player of the Night-a thlan niin league kal meka Mizo zinga he lawmman dawng thei hmasa ber a ni nghal. Sadrak bakah hian Lalramnunfela'n point 16 hmuin point ruk a paih a, Vanlalchhantluanga Sailo chuan vawi 10 vaw tlain point sarih a hloh.

Chak lo lam ITI-in vawi thum an khelh tawhah point an la hmu lo va, a mawng berah an awm. TNT hmaah mi mala che ṭha ber C. Lalnunpuia chuan point 10 vaw chhuakin ṭum li a tisual a, mi dang awmze nei thama team ṭanpui thei an awm lo.

TNT an chak rual hian zan hmasa lama hnehna chang tawh Durtlang North-in RS Traders PVL semifinal an lut nghal. Team paruk inelnaah hian a sang pali an tlang chho dawn a, khelh thumah point riat an hmu Durtlang North hi table hnuai lama awm Anastasia, Electric Veng leh ITI ten an umpha thei tawh lo.

Zanin dar 8:00 hian a hmun ngaiah league round khelh chhunzawm leh a ni dawn a, champion hmasa ber Anastasia leh kai thar ITI Veng an inkhel ang. Team pahnihte hian match thum an khelh tawhah hnehna an la chang lo, tualchhung volleyball inelna sang bera sulhnu ṭha hnutchhiah tur chuan chak an mamawh hle–a chak lo zawk tan semifinal beiseina a zuih ral nghal thei dawn a ni.