Inter leh Milan inhnehtawk

Nilaini zan Serie A inkhelah AC Milan leh an mikhual Inter Milan te chu goal awm loin an inhnehtawk a, Milan club pahnihte hian point khat ve ve an hmuh belh.

Inter striker Mauro Icardi-a'n goal ruak vawi hnih a khung ṭhelh a, Argentine striker goal khung pakhat chu video assistant referee (VAR) hman a nih hnuah hnawl sak a ni.

San Siro-ah inkhel ṭan hmain AC Milan tana match 74 khel tawhtu Ray Wilkins sunna hun hman a ni. Kum 61 mi Wilkins hi April 4 khan a thi a, Milan captain hlui Franco Baresi chuan Wilkins-a jersey rawn lek chhuakin, England international hlui tan hian pangpar dah a ni bawk.

A goal lo
Inter Milan captain Icardi-a'n Milan tlarhnung offisde trap bumah inngaiin chiang zetin goal hmahruai khung mah se VAR hmanga ennawn a nih hnuah offisde tia pawm a ni lo. AC Milan striker Patrick Cutrone-a'n mawi zeta a bin luh pawh offisde vanga pawm sak loh a nei ve tho.

Milan lamin ball chang hnem mah se goal hmaah an hlauhawm lo zawk a, Inter midfielder Antonio Candreva-a cross chu hnai set sawt aṭangin vengtu nei lo Icardi-a'n a khung ṭhelh a, hun tawp dawn ṭepah awlsam tea goal ruaka khung zeuh theih mai tur chu goal ban hrulah a pet chhuak bawk!

Kum 25 mi Icardi hian tun season Serie A match 26 a khelh aṭangin goal 26 a khung a, season tir lama Milan derby khelh a nih khan hattrick a siamin, a club hi an hmelma lakah 3-2 in hnehna a chanpui. Tun ṭumah erawh a vanduai a, goal khungna hun ṭha nei chung siin goal a kung lo.

Inter hian match 30 khelh aṭanga point 59 hmuin league table-ah palina an ni a, season thara Champions League khel turin an dinhmuna a la ṭha tawk lo–pathumna AS Roma aiin point khatin an hniam a ni. Milan erawh paruknaah awmin, Europa League an la beisei thei thung.