Indian Super Cup-ah Samuel a chawnglaizawn!

Indian Super League leh I League club inelna Super Cup-ah Mizo hming a mawi leh ta–Shillong Lajong captain Samuel Lalmuanpuia chuan Pune City lakah Meghalaya club tan chakna goal a khung a, a goal khung hi Mizo lam 'chawnglaizawn' hmangin a lawm.

Kalinga Stadium-a inkhelah Pune City-in minute 21 chhungin goal hnih an khung hman a, Khasi club-in chuti maia tlawm erawh an tum lo. Abdoulaye Koffi, Rakesh Pradhan leh Samuel Lalmuanpuia ten goal khat ṭheuha chhangletin I League club an chak daih.

Zemabawk North tlangval Samuel-a chuan, "Kan inhmachhawn dawn tih kan hriat kha chuan hnehna chan ka beisei lo. Mahse, goal hnih hmanga kan chhanlet hnuah inrintawkna kan nei a, ka rilruah kan chak ngei tura ngaihna lian tak ka nei a ni," tiin Vanglaini a hrilh–Hero of the Match-ah thlan a ni.

Ti tak tak Pune!
ISL club zingah Pune City-in Super Cup an ngai pawimawh a, an starting XI-ah pawh ram pawn player panga ngawt awmin Lajong aṭanga hriat hlawh Isaac Vanmalsawma'n ISL club tan bul a ṭan ve bawk.

Pune-in inkhel ṭantir aṭangin game an thunun a, AS Roma midfielder hlui Jonatan Lucca chuan minute 17-na lekah goal hmahruai a khung. Shillong club an siamṭha hman lo, minute thum a liam a, ISL-a player hmuhnawm pawl ni phak Marcelinho chuan an goal hnihna a chhunzawm.

Shillong Lajong an talbuai tih hai rual a ni lo a, Bhubaneswar khawpuia inkhelah I League club an thawh leh theih a rinawm tawh lo.

Beidawng lo Lajong
Samuel Lalmuanpuia captain-na hnuaia khel Lajong-in tlawm erawh an tum lo. I League club-in awlsam taka thaibo chi an ni lo tih pholangin minute 29-naah an chhanglet a, Ivorian forward Abdoulaye Koffi chuan an si phurh a sut ṭhen.

Goal dang lut loin chawlhlawk hman a ni a, Lajong bawk kan hmu nawn–minute 61-naah Rakesh Pradhan chuan an si phurh a sut zo a, sum ngah ngah hmelṭha tihna ramah rawlthar talent nei ṭha rual awmkhawmna ten club hausa Pune an barakhaih.

Minute 90 a zo a, goal dang a luh loh avangin extra time khelh a ngai dawn niin a lang hman. Mahse hun pek belhah Shillong keeper hlui Vishal Kaith-a'n Abdoulaye Koffi a ti tlu a, penatly a chawi. Mizo rawlthar Samuel-a'n a pet goal a, Lajong an chak.

Pen khat zelin...
I League-ah Samuel Lalmuanpuia a langsar a, Emerging Player of the League-ah hial thlan a ni. Super Cup-ah pawh Zemabawk North tlangval a langsar zel a, kum 19 mi lek midfielder-in captain armband hreng chunga a team a kaihhruai dan chu hmuhnawm a tling.

Samuel chuan, "Inelnaa kan tel chuan champion kan tum tur a ni a, mahse chumi ringawt rilrua dah erawh a thiang lo. Pune kan hneh a, tunah chuan quarterfinal-a Mohun Bagan nena kan inkhel tur chauh ka ngaihtuah leh tawh, pen khat zelin kan pen ang," tiin Vanglaini a hrilh a, a ṭawng pawr duh lo.

Nizan khan Super Cup inkhel dangah East Bengal leh Mumbai City an inhmachhawn a, he thu buatsaih lai hian an result kan hre hman lo–he inkhela chak zawk hi Aizawl FC hmachhawn tur an ni. Zanin dar 8:00-ah last 16 match hnuhnung ber khelh a ni ang a, Neroca leh Kerala Blasters an inkhel ang.