Agent hlawhah Premier League club inseng hnem
Premier League club-te chuan nikum khan football agent hlawh atan ringawt pound maktaduai 211 an inseng a, a hma kum aia a tam zawkna chu pound maktaduai 37-a ni.
Football Association-in February 1, 2017 - January 31, 2018 inkara Premier League club-ten agent hlawha sum an sen dan an chhinchhiah danah chuan Liverpool chu agent hlawha inseng hnem ber an ni a, pound maktaduai 26.8 an inseng.
Chelsea chu Reds hnuai chiahah hian awmin London club hian agent hlawh atan pound maktaduai 25.1 an seng a, agent hlawh atana inseng tlem ber non-league club Aldershot chuan £112 (Rs. 10,253) chiah an seng thung!
Sum ngah ngah
English club ten 2016-17 season-ah agent hlawh atan pound maktaduai 220 an seng a, 2017-18 a a punna zat hi pound maktaduai 37 a ni. Premier League hnuai chiah Championship club ten pound maktaduai 42.1 an seng a, League One club ten pound maktaduai 3.5 an seng thung.
League Two club ten £958,969 an inseng a, agent hlawh atana sum sen tlahniam awmchhun chu National League (non-league) club te an ni a, £271,065 an sen ṭhin aṭangin £188,869-ah a tla hniam.
Premier League club tan 2017-18 season-a player lei nan hrim hrima sum an sen zat chu pound tluklehdingawn 1.9 a ni a, agent hlawha an inseng hnem hi a mak lo.
Sum sen dan
Premier League club zingah Manchester City chu Liverpool leh Blues tih loha agent hlawh atana inseng hnem an ni a, pound maktaduai 23.5 an inseng. Manchester United (£18m), Watford (£13.4m), Everton (£12.1m) leh Arsenal (£10.6m) insen zat pawh a nep lo.
Huddersfield chu Premier League club-a inseng tlem ber an ni a, pound maktaduai 2.5 chiah insengin Burnley (£3.3m) pawh an inseng tam bik lo. Championship club zingah Aston Villa (£5.5m) an inseng tam ber a, Sunderland (£4.4m) leh Reading (£2.8m)-in an dawt.
Bolton-in £223,432 chiah sengin Championship-a inseng tlem ber an ni a, League One-a inseng hnem ber Blackburn (£764,024) an phak lo. League Two-a inseng hnem ber Coventry-in agent hlawh atan £113,620 an seng a, English football league aṭanga kum 112 chhunga a vawi khat nana pet chhuah Leyton Orient chu non-league club-a inseng hnem ber niin £39,537 an inseng.
Note: £=pound m=maktaduai