Novak Djokovic a buai?

Tun hnaia beisei phak lo Novak Djoko­vic-a'n insiam ṭhat a tum a, a coach Andre Agassi nen an thawhdunna an tih tawp hnu lawkah, Agassi aiawh chho tura ngaih Radek Stepanek nen an inṭhen zui ve leh ta.

World number 1 hlui Djokovic hian nikum Wimbledon hnuah tournament vawi thum chiah a la khel. A kiu hliam dam tawh mah se duhthusamin a dam hleithei lo a, court chhunga a inlan ṭum pawhin beisei ang result a nei thei chuang lo.

Grand Slam vawi 12 champion tawh Djokovic hi kumina inelna lian hmasa ber Australian Open-ah khan last 16 a paltlang zo lo a, Masters 1,000 inelna zinga pahnih Indian Wells leh Miami-ah te hnehna chang loin a tla bawk.

Khawthlang media-te chuan Djoko­vic leh Agassi inkar boruak a ṭhat loh thu an sawi hnu lawkah an inṭhen a, coaching team zinga awm sa Stepanek nen season an hmang chho dawn niin an ziak zui bawk a ni.

Amaherawhchu, beisei angin thil a kal lo. Official website-ah Djokovic chuan, "Miami Masters khelh zawh a nih hnu khan Novak Djokovic leh coach Radek Stepanek te chuan an thawhdunna tih tawp an duh a, mimalin inpawh ṭha viau mah se tennis chungchangah chan an inkar a tawp rih," tiin thuchhuah a siam.

Serbian tlangval hi a inkhelh mumal loh rei tawh avangin world ranking-ah pawh a hnungtawlh nasa hle, number 13 ni mekin May thlaa khelh tur Madrid Masters-a inlan turin inbuatsaihna a nei mek.