MSL-ah Zarkawt Serpents an let
Mizoram chhunga basketball inelna sang ber Mizoram Super League Season 5 khel leh turin Zarkawt Serpents chuan Ningani zan khan Hawla Indoor Stadium-ah Republic VR4 chu 92-89 in an hneh. Serpents hian game 1-ah 86-80 in hnehna an chang tawh a, game 2-ah hnehna an chan leh tak avangin game 3 khelh a ṭulna a awm ta lo.
Serpents hi tualchhung basketball-ah chuan club hlun leh ngelnghet an ni a, MSL ṭantirh pawh khan playoff nghai loa tling nghal zinga mi an ni.
Season khat chauh
Republic VR4 chuan an club history-a a vawi khat nan MSL4-ah an inlan a, league round-a an hneh chhun chu Mission Vengthlang Hollow an ni. VR4 hian relegation playoff-ah Hollow hi an hneh nawn leh a, amaherawhchu MSL khel turin qualifying-a pahnihna an hneh leh phawt a ṭul a, an tlin ta lo.
Game 1-ah nasa taka hma an hruai hnuah an inpawh thlak tir a, game 2-ah thawnthu a danglam tam lo. Third quarter-ah point 11 ten hma hruai mah se VR4-in ṭum dang ang thoin a tawp an thleng zo lo a, Mizoram league sang ber an khelh hun chhung season khat zawh rualin a tawp nghal.
Serpents an let
MSL3 relegation playoff-ah Zarkawt Serpents-in Hollow BBSP hneh loin an tla a, tun ṭumah hian Zarkawt club hian Hollow coach Samuel Lalthlamuana chu playoff-a team enkawl turin an la.
Veteran coach El-a'n Serpents player bakah VR4 player a hrechiang a, hei hi ADBBA club-in MSL club an hneh theihna chhan pakhat a ni. Game 2-ah captain Hmingthanmawia chhawr thei lo mah se state pawn player Sahil Sharma leh Lalramropuia (LR-a) te an che ṭha a, 92-89 in hnehna an chang.
An lawm
Zarkawt Serpents coach Michael Lalchhuanawma chuan, "El-a min rawn telpui hi kan hlawk khawp mai. Training nei tam hman lo mah ila kan thil zir chhun kan hmang ṭha hle. Hnehna kan chan hi Pathian vang liau liau a ni a, club board te inpekna a nasa a, player-te thawhrim rah a ni a, kan vannei tel bawk," tiin Vanglaini a hrilh.
Michael-a chuan sawi chhunzawmin, "MSL kan khel thei hi kan lawm a. Kan lawmna tak erawh hnehna kan chang hi a ni. Keini chuan tualchhung basketball chawi san zel hi kan duh a, club hlun leh ngelnghet kan nihna lantir zel hi kan duh ber a ni," tiin a sawi.
ADBBA champion Serpents hian qualifying round-ah BC Bethlehem hneh lo mah se qualifying-a pahnihna nichunga MSL club hneh hmasa ber record an siam.