UFC 223 - Khabib vs Max McGregor kawnghren an hlih sak

Conor McGregor chu UFC lightweight kawnghren a kawl lai hlihsak a ni a, Pathianni zing dar 8:30-a UFC 23-ah Irish fighter hnu­chhawn hnu kawnghren hi Khabib Nurmagomedov leh Max Holloway ten an inchuh ang - fight hi Sony ESPN chuan live-in an pe chhuak dawn a ni.

UFC president Dana White chuan McGregor kawnghren hi an hlih sak thu a puang a, Khabib leh Max ten an inchuh tur thu a sawi nghal bawk. Dana White chuan, "Nur­­­magomedov leh Holloway in­hma­­chhawna chak zawk hi light­weight champion thar an ni dawn," a ti.

Eng nge a chhan?
McGregor hian kum 2016 khan UFC 205-ah Eddie Alvarez hnehin lightweight kawnghren hi a kawl a, mahse thla 17 hnu zetah pawh MMA lamah a hmel hmuh tur a awm loh avangin a kawnghren hi chhuhsak a ni ta a ni.

Irish fighter-in UFC thutluknaah a lungawi loh thu sawi mah se kuminah erawh fight a hmachhawn ngei dawn tih Dana White chuan a sawi. UFC president chuan, "Conor hi kumin chhungin a lo kir dawn tih 100%-in ka sawi ngam a, fight a hmachhawn dawn," a ti.

Sorry Tony!
UFC 223-ah hian a tirah tak chuan Nurmagomedov leh Tony Ferguson zawk inhmachhawn tura tih an ni a, mahse 'El Cucuy' tia hminglem an pek fighter hian Russian fighter Khabib hma­chhawn tura inbuatsaihna a neihna lamah a khupah hliam a tuar a, a inhnukdawk.

Khabib leh Tony inhmachhawn tur tih khawtlai a nih vawi khatna a ni lo. December 2015 khan a vawi khat nana intawng tura tih ni mah se Khabib-a'n hliam a tawrh avangin ṭhulh a ni a, hemi hnuah hian vawi thum an ṭhulh leh tawh bawk!

Mi huaisen Max?
Tony-a inlan theih dawn tak lohah chuan a hmun ruakah hian Max Holloway chu dah luh a ni a, UFC featherweight champion hian lightweight khel turin a weight division a ti sang. Max-a'n UFC 223-ah Khabib a hmachhawn dawn tih hrilh a nih hian ni ruk chiah hun a nei tawh a, hetichung hian huaisen takin a pen chhuak.

Hawaiian fighter hmachhawn tur Khabib Nurmagomedov hi fight 25-a hnehna chang vek thei a ni a, hetihruala Max-a record hriat tel sak atana ṭha a awm ve tho. Kum 26 mi fighter hi a zawna featherweight legend Jose Aldo leh UFC lightweight champion hlui Anthony Pettis hneh theitu a ni.

Inhlau lo
Nurmagomedov-a'n ṭawngkam hriam tak tak hmangin Ferguson bei ṭhin mah se Max lakah erawh ṭawngkam mawi lo a hmang lo. Kum 29 mi fighter chuan, "Max atan chuan zan rei tak a ni dawn a nih hi. Max hi ka zah a, mah se ka team, ka ṭhiante leh ka chhungte hmaa min knockout tum tur a ni a, cage khar a nih rualin minute 25 chhung chu hrehawm taka awmtir ka tum ang," a ti.

Max Holloway a zam duh lo. Vawi 22 fight a neiha vawi 19 hnehna chang thei chuan, "Legend zinkawng chu hei hi a ni," a ti a, a khingpui tur Khabib fak nghalin, "Khawvela a ṭha ber pawl a ni a, mi tam takin hmachhawn an chak lo. Mahse, khawvela ṭha ber ni tur chuan a thiam ber te kan hmachhawn a ṭul a, tunah chuan ka inpeih tawh," tiin a sawi.

Conor hmaah tu nge?
UFC lamin a champion kawng­hren hlihsak mah se McGregor a la inlan leh ngei dawn tih a chiang a, Irish fighter hian octagon a luh leh hmasak berah Nurmagomedov leh Max in hmachhawna chak zawk hi a fight a rinawm.

Dana White chuan, "Conor McGregor leh Khabib inhmachhawn se a hmuhnawm ang," tiin duhthu a sam, Conor-a'n Max hi 2013 khan a lo hneh tawh a, Khabib nen erawh an la inhmachhawn miah lo - mipui hriatah Khabib leh Conor hi an lo intawng zeuh zeuh tawh.

Conor leh buaina
Barclays Center, Brooklyn, New York-ah UFC 223 inbuatsaih nen media kawmna hun neih a ni a, he hun zawh tawh lamah hian McGregor leh a nauten buaina an siam - fighter rual phurtu bus an tibuai a, UFC president Dana White chuan, "Thil dik lo hulhual a ni a, ka thinrim takzet a ni," a ti.

McGregor hi a hnuah New York Police-ah a inpe a, thubuai erawh siamsak a la ni lo. NYPD thupuangtu chuan Police hnena McGregor inpek thu hi an puang a, thil thleng chu an chhui mek avangin Irish fighter chu thubuai an la siamsak loh thu a sawi bawk.