Manchester Derby - City champion zan?
Manchester United hliah-khuhna hnuaia awm, manager ropui Sir Alex Ferguson-a'n 'ṭhenawm bengchheng' tiha an chanchin a sawi duh ṭawk Manchester City hun a inher ve ta. Pep Guardiola hote hian zanin dar 10:00 hian Etihad Stadium-ah an hmelma United an mikhual ang a, hnehna an chang a nih chuan tun season Premier League champion an ni ang.
A vawrtawp
City hian tun season-ah Liverpool chiah Premier League-ah hneh loh an la tawng a, match 31 khelhah point 84 an hmuh tawh avangin an champion hun chu eng pawh ni se nomawi chawitu tur an ni tih rinhlelh tur a awm tawh lo.
Pep-a hnuaiah midang chungah an leng a, an chet ṭhat fal avangin nomawi ringawt hian hlimna vawrtawp a pe thei tawh lo ang. City tana lawmna vawrtawp thlen theih tirtu tur chu an hmelma Manchester United hneh chunga nomawi chawi a ni.
Sakeibaknei hliam
Premier League chhin-chhiahna atana an hman chu sakeibaknei a ni a, league-a che ṭha ber team hi sakeibaknei nena khaikhin theih tak a ni. Tun season-ah City hi sakeibaknei chu an ni a, an lal ram chu Premier League hi a ni a, amaherawhchu Europe-ah erawh league lama an lawmna vaw dai ṭhak khawpin Liverpool-in an sawp.
Hliam tuar City tan intuai thar turin United hneh hi damdawi ṭha a ni a, Pep Guardiola'n 'Reds Heavy Metal' laka 'Tiki Taka ropuina pholan a tum a nih pawhin Manchester Derby a ngaihthah thiang lo ang. Champions League quarterfinal second leg awm lo se Mourinho hmabak chu 'Bus Park' a nih hmel a, amaherawhchu City-in United vanga league nomawi an chan theih tawh loh avangin Portuguese manager leh a hote tan hliam tuar sa hliam belhchhah theihna hun ṭha a ni thei bawk.
A hre reng dawn
Manchester United player hlui Paul Ince chuan, "Man United fans, player leh Jose Mourinho ten a hmun ngeia Manchester City champion lai hmuh chu an thil hreh ber a ni hial ang. City erawhin an hmelma lian ber laka anmahni mualah ngei nomawi an chawi duh dawn a, a chhan chu hei hian ropuina chu Old Trafford aṭangin Etihad Stadium-ah a insawn tih a lantir theih vang a ni. City hi an chak a nih chuan inkhel chanchin hi hriat reng a ni tawh dawn a, mipuiin 'Pep-a'n Mourinho hmaah ngei nomawi a chawi kha in la hria em?' an ti ang a, United ṭantute tan zah ngawih ngawihna tur a ni ang," tiin derby pawimawh zia a sawi lang.
England tana mihang captain hmasa ber Ince chuan, "Man United hian attacking football an khelh ṭhin avangin player a hip ṭhin a, tunah erawh hmuh tur a awm lo. Tun dinhmunah chuan City, Liverpool leh Tottenham te hian chutiang chuan an khel a, player ṭhain hetiang game khel club-a kal hi an duh a ni. Dik taka sawi chuan tun season pum chu United khelh dan avangin anmahni ṭantute an hrilhhai a ni," tiin Mourinho hnuaia United khelhdan a sawisel tel bawk.
City defender Vincent Kompany chuan, "Manchester City ṭantute hian tun anga hun ṭha hi chu an damchhungin vawi khat bak an tawng lo ang," tiin United hneh chunga champion a hlut zia a sawi lang ve tawh bawk.