Didina'n mual a liam

Mizoram football hmasawnna tura tha thawhhlawk tak Benjamin Laldinpuia Khiangte (Didina) chu nimin chawhma dar 10:35 khan aspiration pneumonia vangin a thi a, vawiin chhun dar 12:00 hian Venghlui thlanmualah vui liam a ni ang.

KC Lalvunga (L) leh Darhmingthangi fapa Didina hi kum 60 mi a ni a, Mizo football tan channa a ni. A pa hnathawhna vangin Australia-ah awmin Under 14-ah state player a ni a, kum 1976-ah Mizoramah raw hawiin kum 1984-a Aizawl FC din a nih theihna kawnga mi pawimawh a ni.

Football khelh a chawlhsan hnuin coach a ni a, kum 1997 khan National U19-ah Mizoram chu final thlen puiin Mizoramin national level-a record a neih ṭhat ber a ni reng ṭhin a, 2003-a Mizoramin Lammual ngeia U16-a champion khan he record hi thai chhiatin a awm.

Didina hian Sub Junior aṭanga Santosh Trophy thlengin Mizoram team a enkawl tawh a, MPL-ah Reitlang FC enkawl tawhin Goa first division club Faria Strikers chu a champion pui tawh bawk.