Arsenal-in hna zatve an zo
Europa League semifinal thleng turin Arsenal tan kawng thui zawh a ngai tawh lo. Ningani zan khan Arsene Wenger-a naute hian an mikhual CSKA Moscow chu 4-1 in an sawp a, inkhel dangah Atletico Madrid, RB Leipzig leh Lazio te pawhin hnehna an chang ve bawk.
Emirates Stadium-a inkhelah Aaron Ramsey leh Alexandre Lacazette ten goal hnih ve ve an khung a, mikhual tana Aleksandr Golovin-a freekick mawiin an mualphona a hliah khuh phak lo. April 12 zan hian Russia-ah second leg khelh leh a ni ang.
Bul ṭan fuh
Arsene Wenger-a'n season thara Champions League an khelh theihna kawng ṭha a ni tih hriain, Russian club lakah a player neih ṭhat ber a chhawp chhuak. Gunners-in ball an chang tam a, rang tak takin an inpe kual nghal, minute kuana lekah Ramsey-a'n a hmawr bawkin goal hmahruai a khung.
Wales international Ramsey hian Mesut Ozil hnen aṭanga a ball ṭha bik hmuh chu boruak a zuang chungin a kheng lut bawk, Ramsey-a'n goal mawi a khung theih nan hian Arsenal-in tun hma lama an game mawi ang kha an lantir hmasa bawk.
Arsenal playmaker Ozil-a'n midfield a thunun a, a penalty hlawhchhuah chu Lacazette-a'n goal atan a chantir a, France international hian chawlhlawk hmain an goal hnihna leh an team goal lina a khung bawk–North London club hian tun hnaiah a zawnin match nga hnehna an chang ta.
Goal li khunga hnehna an chan avangin Arsenal an lawm a, hliam vanga midfielder Henrikh Mkhitaryan an chan avangin an lawm erawh a kim lo. Armenian international hi tun kartawpa Southampton an mikhual hnuah a inlan thei lo zui ang.
A zatve zo
CSKA Moscow laka hnehna an chan hnuah Arsene Wenger chuan an hna zatve an zawh thu a sawi a, chutihrualin chak chiang sa an la nih bik loh thu a sawi bawk.
French manager Wenger chuan, "Hna zatve kan zo, hun chanve chhung khan team pahnih ten kan theihna zawng zawng kan hlan a, duhthusama ṭhain bul kan ṭan a ni. Mahse, tunah hian kan tlang tihna a la ni lo, khualmualah fimkhur takin kan khelh a ngai ang," tiin a sawi.
Arsenal hian Europa League match 11 an khelh tawhah vawi riat hnehna an chang thei a, goal 27 khungin anmahni lamah goal 11 a lut thung. Premier League-a parukna hian league match khel turin Pathianni zan dar 6:45-ah Southampton an mikhual ang.
Atletico an nghet
Wanda Metropolitano-ah Atletico Madrid tan Koke chuan an mikhual Sporting Lisbon lakah second 23-na lekah goal hmahruai a khung a, Antoine Griezmann-a'n chawlhlawk hmain an goal hnihna a khung belh bawk.
Chelsea striker hlui Diego Costa chuan an goal thumna khung theihna hun ṭha vawi hnih nei mah se a hlah a, goal an chhuah loh avangin Diego Simone naute tan second leg a awlsam phah ang–an khelmualah hian a zawnin match riat hnehna an chang ta.
Spanish club hian 2010 leh 2012 khan Europa League nomawi an chawi a, chumi hnuah Champions League final vawi hnih khel mah se a chak lo zawkah an ṭang ve ve. Manager Simone-a'n, "UCL final-a chak loh ai chuan Europa League champion nih ka duh zawk," tiin a sawi tawh a, kuminah hian champion an tum ruh hle.
Inkhel dangah Lazio chuan an mikhual Red Bull Salzburg lakah 4-2 a hnehna changin an dinhmun an siamṭha nghal viau. German club RB Leipzig pawhin si khat faia Marseille hnehin semifinal luh an beisei ve bawk.