Ram tan Nadal inlan dawn

Tun kar tawp hian Spain leh Germany ten Davis Cup quarterfinal an khel dawn a, hliam vanga chawlh hmang mek world number 1 Rafael Nadal a dam tawh a, ram leh ram mipa tennis team hmanga inelnaah hian a inlan dawn.

Spain hian Valencia-ah Germany hi an lo mikhual a, nizan khan inelna hi neih ṭan niin Pathianni zan thleng a awh ang. Grand Slam vawi 16 champion tawh Nadal hi singles-ah a inlan dawn, Australian Open hnua a match hmasa ber tur a nih avangin a tan fiahna a ni ang.

Kum 31 mi Nadal hian nizan khan Philip Kohlschreiber a hmachhawn a, he thu buatsaih lai hian result kan hre hman lo. Spain tlangval hian Pathianni zanah world number 4 Alexander Zverev a hmachhawn leh dawn bawk a ni.

World bunber 1 Nadal hi 2016 hnuah Spain tan a la inlan leh lo a, tun ṭum hi a inlan lehna hmasa tur a ni. Davis Cup khelh zawh hi chuan Nadal-a inkhelh thiamna clay court season a inṭan dawn a, a vawi 11 nan French Open champion nih tumin a inbuatsaih chhunzawm nghal thei ang.