Tuichangralin champion lai hneh

RS Traders Pro Volleyball League khelh mekah kai thar Tuichangral chuan champion lai Hunthar Veng chu 3-2 in an hneh a, Aizawl khaw pawn team hian point nga hmuin semifinal an beiseina a nung zel.

Ningani zan R. Dengṭhuama Indoor Stadium, Mualpuia inkhelah Tuichangral hian 25-22, 25-21, 19-25, 23-25, 15-13 (3-2) in hnehna an chang a, Tuichangral rinrawl Shivendra chu RFL Plastics Player of the Night atan thlan a ni. Set ngana bikah Shivendra hian point 12 zet a hlawh chhuak a, match pumpuiah point 63 a hmu a, point16 paihin Tuichangral chakna thapui pawimawh a ni.

Team pahnih an inkhel tawk a, set hnih ve ve an lak hnuah set ngana khelh niin; Tuichangral lamin 10-5 zetin hma an hruai fal. Mahse, Hunthar Veng hian na taka pawtthlain 13-13 an nihpui a, a tawpah erawh Tuichangral an dingchang.

PVL season thum neih tawha chak zawn rei ber Hunthar hian tun hnaiah beisei an phak lo. An match hnuhnung zawkah TNT an hneh hram a, a zawna set nga an khelhnaah erawh Tuichangral an ngam ta lo–champion nawn an tum a nih chuan insiamṭhat an mamawh hle.

Mizoram Volleyball Association hnuaia team ṭha paruk ten league round match thum ṭheuh an khel zo ta a, kaithar Durtlang North chuan point riat hmuin hma an hruai a, semifinal an lut tawh. Durtlang North hnungah hian (TNT 7 points), Hunthar (6), Tuichangral (5), Anastasia (1) leh point la hmu lo ITI Vengte an awm.

A pawimawh
Zaninah league round khelh chhunzawm leh nghal a ni dawn a, hmahruaitu Durtlang North leh chak lo hlim Hunthar Vengte an intawng dawn. A chak zawk tan pakhatna ni chunga knockout round luh theihna a ni dawn a, hei vang hian tlang chiang tawh Durtlang North lamin an ti mai mai lo ang.

A zawna match riat chhung hnehna chang tawh Hunthar hi chak lo hlim an ni a, tum ṭumah hian champion lai an nih zia lantir an tum dawn. Team pahnih hian player an nei ṭha a, an khelh tawh aṭanga thlir pawhin chak zawk tur rin thiam a harsa hle.

Season hmasa lama nomawi chawipuitu Lalbiakmuana chuan Hunthar chhuahsanin Durtlang North a zawm a, a club hlui lakah zahngaihna lantir a tum lo ang. Hunthar hian hnehna chan an duh a nih chuan tualchhung player Lalrinhlua leh Samson VL Chhanchhuaha ten an khelh ṭhat a pawimawh ang.