Madrid derby hun a thleng leh ta
Pathianni zan dar 7:45-ah Real Madrid-in an hmelma kumhlun Atletico Madrid an mikhual dawn a, tun season Madrid derby-in ṭum dang ang erawhin ngaihven a hlawh tawk lo.
La Liga-a team inhal intawng turin ngaihven a hlawh tawk loh chhan hi Barcelona chet ṭhat fal lutuk vang niin a lang. Zanin dar 12:15-a Leganes mikhual tur Barca hian match 30-ah chak loh la nei loin pahnihna Atletico aia an sanna ringawt pawh point kua a ni.
Atletico-in an tum ber tur chu pahnihna dinhmun sawhngheh a ni ang a, champion beisei tawh lo Real tan pawh Atletico 'chungah tal' tichunga season khar tum chu an inkhelh chhan ber tur a ni ang.
Ronaldo bawk chu
Real Madrid chanchin sawi a nihin Cristiano Ronaldo tel loa sawi tel a harsa a, Atletico Madrid lakah pawh Portuguese forward bawk a pawimawh leh ang. Ronaldo hian season ṭantirah sawiselna tawk nasa viau mah se match 36-ah goal 39 a khung leh der tawh a, kum 33 mi a nih hnuah pawh a chul thei lo.
Real hi Champions League-a ropui taka Juventus hneh hlim an ni a, Atletico hi Europa League-a chak hlim an ni thung. Phur vanglai taka Madrid derby hi a hmuhnawm ang.
Costa & Griezmann
Season ṭantira Ronaldo ang thoa sawisel hlawh chu Antoine Griezmann a ni a, mah se French forward pawh hian a lo la thiam reng tih a pholang zel - tun season-ah match 39 khelin goal 24 a khung leh der tawh.
Fapa tlanbo Diego Costa kir hnuah Spain international hian a ngainat khelmualah a tlangnel tih a pholang leh diam tawh a, match 13-ah goal ruk a khung tawh. Griezmann nena an inkawp a hmuhnawm ṭhin hle.