Chelsea hmaah Tottenham
Pathianni zan dar 9:00 hian Chelsea-in Premier League-ah Tottenham Hotspur an lenchilh dawn. London club pahnih inkhel tur hi a en a châkawm a, chutihrualin Nuno Espirito Santo-a hote hi inhliamin a tihbuai avangin Thomas Tuchel-a hote hi chak tura rinkai zawk an ni ang.
Spurs an buai
Conference League-ah Tottenham leh Rennes te 2-2 in an inhnehtawk a, Spurs-in inhliam an neih belh. Steven Bergwijn leh Lucas Moura te chu inhliam vanga lakchhuah an ni.
Chelsea lakah hian Crystal Palace an hneh loh ṭuma hnawhchhuah Japhet Tanganga chu hrem vangin a khel thei dawn lo. Inhliam vangin Bergwijn, Moura bakah Eric Dier leh South Korea tana inlan ṭuma inhliam Son Heung-min te chu hliam vangin an inlan theih a rinawm loh bawk.
World Cup qualifier khel tura South America-a zin Cristian Romero, Giovani Lo Celso leh Davinson Sanchez te chuan vawin hian London an thleng ang. Spurs player pathum hi Croatia-ah an in quarantine a, training an neih theih avangin match fitness nei lo mah se Nuno-a'n tu emaw ber hi chu a chhawr nghal mai a rinawm.
Spurs hi Premier League match hmasa pathumah an chak vek a, goal an chhuah lo a, point kua hmuin league hmahruaitu an ni. An hmelma Arsenal erawhin point an hmu lo a, goal an khung lo. Amaherawhchu Tottenham hian match hnuhnung berah Eagles 3-0 in an hneh lo a, Blues an hneh lo a, September 26-a North London Derby-a an chak loh leh bawk chuan October thla thlen hmain Arsenal hnuaia awm theih dan a awm.
Blues an inpeih
Chelsea erawh Thomas Tuchel-a hnuaiah bul an ṭan ṭha hle. Blues hian Crystal Palace (3-0), Arsenal (2-0) leh Aston Villa (3-0) in an hneh tawh a, player 10-a an khelh ṭumin Liverpool nen 1-1 in an inhnehtawk.
Blues tan player thar Romelu Lukaku a che ṭha a, sawi hmaih theih loh erawh Tuchel-a hnuaiah tlarhnung a phui ṭha, tih hi a ni. Keeper Edouard Mendy hian a phu ang tawk fakna a la dawng lo a, season liam taa Champions League best keeper hi tun dinhmunah keeper ṭha bera chhal theih a ni hial ang.
Chelsea hian UCL-ah Zenit 1-0 in an hneh a, goal an chhuah lo. Blues hian khualmualah Spurs hi a zawnin ṭum nga an hneh tawh a, ṭum rukna an beisei mek. Tuchel-a hote tun hnaia an khelh dan thlirin a zawna vawi ruk chak hi thil theih a ni.
Lukaku Vs Kane
Season ṭan hma khan Chelsea leh Spurs hi friendly match-ah 2-2 in an inhnehtawk a, hemi ṭum hian Nuno-a'n Harry Kane a chhawr thei lo a, Chelsea-in Lukaku an lalut lo bawk.
England captain Kane hi Premier League top scorer ṭum thum ni tawh a ni a, goal khung tam ber ni lai a nih avangin tun season-ah pawh goal khung tam ber ni tura rinkai a ni.
Chutihrualin Manchester City pan a tum vangin Kane-a'n season bul a ṭan ṭha tawk lo a, Conference League-ah goal hnih khung tawh mah se Premier League-ah goal a la khung lo.
Hetihlai hian Lukaku erawh goal khung loin a awm thiam lo emaw tih mai tur a ni a, Premier League-ah goal thum a khung tawh bakah Champions League-ah goal khat a khung tawh bawk. Spurs tlarhnung tan Belgian striker hi ven uluk a ṭul ang.