Lingard a cham dawn - Solskjaer

Manchester United-in Jesse Lingard pass sual vangin tun season Champions League match hmasa berah Young Boys an hneh lo. September 19, Pathianni zan dar 6:30 hian Ole Gunnar Solskjaer-a hote hian season liam taa loan hmanga Lingard-a khelhna West Ham United an hmachhawn ang.

Solskjaer chuan, "Jesse-a'n West Ham-ah season ṭha tak a hmang a, England-ah a theihna pholangin goal a khung. Amah hi kan thlawp a, kan bula awm turin kan duh. Season khat chauh contract a neih tawh avangin club-in amah leh a pa kan bia a, Manchester United tan a khel zel ang," tiin English midfielder hi a cham tur thu a sawi.

Man United hian UCL-ah Young Boys hneh lo mah se Premier League-a an match hnuhnung berah Newcastle United an hneh. London Stadum-a khel tur Solskjaer-a hote hian away record ṭha tak an nei a, league match khualmuala khelhah match 28 chhung chak loh an nei tawh lo.

Hammers mualah hian inhliam vangin Edinson Cavani leh Marcus Rashford te la khel thei dawn lo a, chutihrualin Cristiano Ronaldo a dam ṭhat avangin tlarhma lam a ngaihtuahawm loh.

Man United vanneihna belhchhah turin West Ham chhuanvawr Michael Antonio chu league match hnuhnung bera Southampton nen an inhnehtawk ṭumin hnawhchhuah a ni a, Pathianni zanah a inlan thei dawn lo.