Salah contract hre ve lo Klopp

Liverpool boss Jurgen Klopp chuan Mohamed Salah contract chungchangah a inrawlh ve loh thu a sawi a, German coach chuan, "A bik takin ka hnen aṭang chuan thuthar sawi tur a awm lo a, contract thar chungchanga inbiaknaah ka tel ve lo," a ti.

Salah hian June 2023 thleng Liverpool-a khel turin contract a nei a, contract thar ziak turin kar khata £500,000 bawr vel hlawh a phut mek nia sawi a ni - kar khatah £200,000 a hlawh mek a, a let aia tam hlawh a phut tihna a ni.

Klopp chuan, "Goal hmaah eng ang takin nge a hriam a, a tuihal tih hi kei chuan ka ngaihtuah ber a, tunah chuan a hriamin a ṭha hle. Chu bak sawi belh tur ka nei lo," a ti - Salah hian tun season-ah match nga khelin goal li a khung leh der tawh a, assist vawi hnih a nei bawk.

Reds hian league match khel turin zanin dar 7:30-ah Crystal Palace an mikhual dawn a, match li an khelh tawhah point 10 an nei mek a, Manchester United, Chelsea leh Everton te nen point hmu sang an ni mek.

Klopp chuan, "Team dang dinhmun ka ngaihtuah lo a, kan bul ṭan danah erawh ka lawm khawp mai. Football ṭha tak kan khel chhuak rihin ka hria a, a sang zinga awm reng kan duh erawh chuan point hloh loh kan zir a ṭul ang," a ti.

Liverpool boss chuan hliam vanga chawl mek Roberto Firmino dinhmun a la ṭhat loh thu sawiin, "Karleh hma chu training pawh a la zawm rih dawn lo a, training a zawm theih hunah a awm zel dan tur chu a sawi theih chauh ang," a ti a, Brazilian striker hmel kan la hmu rih lawk dawn lo niin a lang.