Pep-a'n a hna thawk rawh se - City fans

Manchester City-in Nilani zan Champions League-a RB Leipzig 6-3 a an hneh ṭum khan entu 55,000 awm thei mah se mi 38,000 chauhin an en.

Man City manager Pep Guardiola chuan ṭawiawmna ṭha zawk an mamawh thu a sawi a, Man City official supporters' club general secretary Kevin Parker chuan Spanish manager hi a chhang.

Kevin Parker chuan, "A mak ka ti hle, fan-te tana harsatna hi an hretthiam lo. Nupui fanaute ngaihtuah a ṭul a, Covid-19 vangin inkhel en a buaithlak bawk. Khawvela coach ṭha ber chu a ni tehmeuh mai a, chu chu ti chhunzawm zel se ka duh," tiin khelmual chhunga insawrbing turin a duh.

Chutihrualin Man City hian Champions League hlutna hi an la hrethiam tawk loah a ngaih theih a, Covid-19 hma pawhin ṭhutna khah loh chang a tam. Man United legend Paul Scholes pawhin Europe inelna lian bera Man City-in entu an ngah tawk ṭhin lo chu a lo sawisel tawh a ni.

Pep Guardiola hote hian Champions League nomawi la chawi lo mah se Premier League lamah erawh champion nawn tura rinkai an la ni fan. Spanish manager hian nipui bazarah Sergio Aguero thlak nan Harry Kane la thei lo mah se Man City hian goal khung an harsat lo.

Man City hian tun season Premier League-ah goal 11 an khung tawh a, an hmelma Man United nen goal khung tam ber an ni mek. League bika Citizens goal 11 hi player pakuain an khung a ni a, Ferran Torres chauhin goal hnih a khung. Goal khung thei dang player-te chu Jack Grealish, Gabriel Jesus, Riyad Mahrez, Ilkay Gündogan, Aymeric Laporte, Rodri, Bernardo Silva leh Raheem Sterling te an ni.

Pep-a naute hian kil tin aṭangin goal khung tur player an kawl tihna a ni a, goal khungtu zingah hian inhliam vanga season bul ṭan thei lo Kevin De Bruyne leh Phil Foden te an la tel lo zawk. Man City hian zanin dar 7:30 hian Etihad Stadium-ah Southampton an hmachhawn dawn a, Pep Gaurdiola hote hi chak tur zawka rinkai an ni ang.