Rei lote lo nghak det rawh u - Pochettino

Paris Saint-Germain manager Mauricio Pochettino chuan team inbuktawk tak neih a ṭul thu a sawi a, a team enkawl lai chu an ṭhat dan bera khel chhuak tur chuan hun an mamawh avangin, an laka beiseina nei sang takte chu dawhthei taka lo nghak lawk turin a hrilh.

Lionel Messi an neih hnuah PSG hian ngaihven an hlawh thar zual. Ligue 1 lamah Messi hian minute 24 chhung vel chauh hun a la hmang. Champions League lamah erawh a bul aṭangin a khel; tunah chuan Barcelona captain hlui hi a inpeih chiang tawha ngaih a ni.

Paris club hian Pathianni zan dar 12:15-ah Lyon an mikhual dawn. Messi leh Neymar an dam a, an match hnuhnunga hliam tuar Kylian Mbappe erawh a dinhmun a la chiang lo, dam chiang lo chung chuan an chhawr luih a rinawm lo.

Beisei phak lo
PSG hi Club Brugge nena inhnehtawk hlim an ni. Belgian club ṭantute hian Paris club an mikhual dawn hian, 'Messi zahngai rawh' tih chuanna banner an lo keng a, an duh ang zahngaihna an hmu nge Messi leh a ṭhianten tih theih an nei lo, tih chu zawhna a ni.

Messi, Neymar leh Mbappe ten a vawi khat nan inkhel bul ṭan rual mah se beisei angin an che nghal lem lo. Poch chuan, "Tlarhma hriam leh tlarhnung khawng tak neih kan duh, chumi tur chuan hun kan mamawh," tiin a sawi a, an ṭhat dan berin an la khel lo.

Poch-a naute hian UCL lamah an duh angin bul an ṭan lo a ni mai thei. Ligue 1 lamah erawh match nga an khelh tawh chinah an chak vek a, goal 16 khungin an lamah goal nga chiah a lut, league-ah chuan duhthusama ṭhain bul an ṭan.

Messi an neih tirh khan Parc des Princes leh a chhehvelah fans an pungkhawm nasa. Tun ṭum hi an khelmualah ngei Messi-a'n match a khelh hmasakna tur a nih avangin fans an phur dawn - Argentina captain lak aṭangin goal hmuh ngei an beisei bawk ang.

Fimkhur a ngai
Season hmasa khan Parc des Princes-ah Lyon hian PSG hi 1-0 in an luhchhuah thei, an khelmual hmanthiamah ngei an ngam lo tihna a ni. Poch a awm hnuah erawh hma an sawn zel a, tun ṭumah chuan mikhual team tan chak a harsa tawh dawn.

Lyon hian nipui bazarah khan rin loh tak maiin Jerome Boateng an lalut. Germany international hlui hian a club thar tan hian match hnih a khel tawh, zanina a hna tur chu Messi leh Neymar dan tum a nih dawn avangin a hautak khawp ang.

Bayern Munich tana a khelh laiin Boateng hi Messi-a'n chiang zeta a bum hnuah goal a khung tawh. Barcelona captain hlui hlauhawmzia hrechiangtu chu Boateng hi a ni - Ligue 1 club tana season hnih daih contract ziaktu hian inbum nawn tir a tum lo ang.

Kum 33 mi Boateng hian season hmasa khan Bayern tan league match vawi 29 a la khel phak, vawi nga chiah inlan loh a nei. Hun rei lote chhungin a theihna hi a tlahniam ngawt dawn bik lo a, chuvangin PSG tlarhmate tan sut tlang a awlsam bik kher lo mai thei.