Juve leh Milan tan fiahna - an intawng dawn!
Pathianni zan dar 12:15-ah Juventus chuan AC Milan an mikhual dawn a, Italian club lian pahnih tan Serie A-a an inkhel tur hi fiahna hautak a ni.
Juve-in league match thum an khelhah point khat chiah an la nei a, an mikhual tur AC Milan hi match thum an khelh tawhah an la chak vek thung - AS Roma leh Napoli te nen match thum khelh tawhah an la chak vek.
Serie A lamah club pahnih tawn chin a inang lo a, Champions League-ah pawh thawnthu a danglam. AC Milan hi 3-2 a tlawm hlim an ni a, Juve hi 3-0 a chak zo hlim an ni thung!
Juve beiseina
Cristiano Ronaldo-a'n rin loh taka Juve a chhuahsan khan Italian club ṭantute chuan, "Tuin nge Ronaldo mamawh?" tih thuziak an keng a, Ronaldo chhuah hnua league match hnih an khelhah an tlawm ve ve thung.
Coach thar Massi-miliano Allegri-a'n he thawnthu duhawm lo hi thlak danglam a duh dawn tih a chiang a, league match hmasa berah Udinese an lo inhnehtawkpui tawh bawk si avangin match thumah point khat chiah an la nei - an dinhmun a chau hle.
Mahse, Juve hian Champions League-a an match hmasa berah Malmo chu khualmualah 3-0 ngawtin inkhelh an zirtir a, Alex Sandro, Paulo Dybala (penalty) leh Alvaro Morata ten goal an khung - goal khungtu player thlirin he team hi an ṭha tawk tih a chiang a, an phur vanglai taka Milan 'kher' mikhual erawh an chak bik lo ang.
A tak ram
AC Milan-in an league match hmasa pathumah hnehna an chang vek a, mahse, Champions League-ah Liverpool-in 3-2 in an lo hneh a, inkhel entu chuan scoreline-in inkhel a hrilhfiah lohzia an hmu ang - Milan-in chet an harsat.
Italian club enkawltu Stefano Pioli chuan, "Game tawp thlenga kan beidawng lo khan kan 'level' thlen chin a pholang. Level sang tak chungchang kan sawi a, a la harsa mai the. Mahse, Liverpool nena kan inkhel hi inzir nan hman kan tum ang," a ti.
Pioli-a'n Liverpool 'level' an la thlen loh thu a sawi a, inzir nan erawh an hman thu a sawi - an hmachhawp chu Juve a ni a, an inzir hlawhtlin leh tlin loh a hriat dawn. Hetihrual hian striker chhuanvawr Zlatan Ibrahimovic chu a hliam vangin a la inlan theih a rinawm chiah lo.
Mou-a Roma!
Jose Mourinho-a'n a enkawl miau avangin AS Roma-in ngaihven an hlawh thar a, Portuguese coach enkawlna hnuaiah Italian club hi an la tlawm miah lo - Ningani zan khan Roma hian Europa Conference League lamah CSKA Sofia chu 5-1 in an sawp.
CSKA tan Graham Carey chuan goal hmahruai khung mah se Lorenzo Pellegrini (2 goals), Stephan El Shaarawy, Gianluca Mancini leh Tammy Abraham hmangin Roma-in an chhang a, minute 80-naah Sofia winger Yanic Wildschut hnawhchhuah a nih bawk avangin Bulgarian club tan thawhleh ngaihna a awm tawh lo.
Roma hian league match thum an khelh tawhah hnehna an la chang vek bawk a, Mourinho-a team hian Pathianni zan dar 9:30-ah league match khel turin Verona an lenchilh ang.