Marquez-a'n beisei a nei sang

A ban na vangin season hmasa leh kumin tir lamah inelna a hmachhawn thei lo a, tunah chuan Marc Marquez pawh a dam chiang takzet ta. Pathianni tlai dar 5:30-a tlan tur San Marino GP atan a phur tawh thu a sawi.

Inelna neih hnuhnung Aragon GP-ah khan Marquez hian hnehna a chang teuh hle, mahse a hma a tlan Francesco Bagnaia a lehpelh theih loh avangin pahnihnaah a lungawi a ṭul.

Honda rider Marquez chuan, "Aragon-ah inelna nuam leh ropui kan nei zo chiah, chumi hnua intlansiak hmachhawn leh nghal chu thil châkawm tak a ni. Eng ang takin nge ka tlan theih chu kan hmu leh ang.

"Tlanchhinna kan neih chinah chuan harsatna kan tawk vak lo, chuvangin a takah pawh Honda team kan chet ṭhat ka beisei," tiin beisei a neih san thu a sawi.

Bike intlansiakna sang berah hian Fabio Quartararo chuan point 214 hmuin hma a hruai mek. Spanish tlangval Marquez hian point 79 hmuin 10-na dinhmun a luah a, season tawp hma ngeiin an inkar a sawr zim a rinawm.