MANCHESTER/ COVIDCHESTER?

Infiamna khawvelin Covid-19 avanga hun rei tak a kal mumal loh hnuah lei rem a rap leh ṭan ta a, Old Trafford-a Cristiano Ronaldo rawn let pawh pui tak a ni. A hmunah mipui sing telin an en a, TV lam aṭangin maktaduai telin an en bawk.

Hri lengin ziaawm lam a pan viau tawha kan ngaih lai hian Manchester United khelmual ṭhenawm lawka awm Old Trafford-a (Cricket khelhna zawk) ball sen hmanga Virat Kohli leh James Anderson-a te inchhaih buai leh tur chu khawvel cricket ngainatuten thlir ṭhup mah se Covid-19 vangin a buai.

Manchester khua chuan kartawp lamah infiamna palai mihring nuai chuang fe thleng turin an inbuatsaih a, peih pawh an inpeih. Amaherawhchu September 10 khua a lo var meuh chuan, 'Chanchin Thar' chanchin lawmawm loin hmun laili a rawn chang ta.

Cancelled/Forfeit/ Postponed
He sap ṭawng thumal pathum hi, media leh breaking news zawng zawngin an hman dan a inang lo ta vek a, cricket khawvel mit fukna chu Jasprit Bumrah leh Joe Root-a te in chaltauh lai ni loin Board of Control for Cricket in India (BCCI), England and Wales Cricket Board (ECB) leh International Cricket Council (ICC) te ṭawngkam hmanga inbeihna a ni ta zawk.

Cancelled tih chuan inelna hi an ṭhulh tihna a ni a, forfeit a nih chuan Covid-19 vanga buai India an tlawm tihna, Postponed a nih chuan inkhelh hun an sawn tihna a ni thung. Eng ber hi nge dik tih pawh hriat lohin vawiin thlengin rin thu a la leng vel a, hriat theih chin erawh Test match vawi li an khelh tawhah India-in 2-1 in hma an hruai mek.

Covid-19
Manchester khaw lamah thu lai la turin LLTF awm ve hek suh, India team chuan Test match hnuhnung ber an khel dawn lo! an khel dawn! ni hniha pawh tlai a ni! September 9 chhoah chuan thuthang leng vak a tam ngei mai.

He thubuai inṭanna hi eng dang ni loin, Covid-19 vang a ni. India team physiotherapist Yogesh Parmar a chuan a hma ni lawka a inhawlhna lamah Covid-19 a kai tih hmuhchhuah a nih vang a ni.

Team Physio lah, an hna chu team member zawng zawng fit thei ang bera siamtu, mi tupawh hnim hnai ber a lo ni bawk si. Bio Bubble khauh zet mai pawhdul a nih hret avanga, khawi aṭanga an kai nge tih hriat tawh ni hek suh, hri kai ber pawh hi dem theih a ni bik lo.

Inkawhkual Hun
India team pumpui chuan, test match chu khelh loh mai nise tih an rawt ta. Heta ṭang chiah hian anmahni chhung lama inrelbawlna chungchanga buaina ngah ve tak BCCI tan luihaina thar a lo piang chhuak.

Tunkar tawp hian Covid-19 vang bawka an khelh zawh theih tak loh Indian Premier League chu khelh chhunzawm a ni leh dawn. IPL hi BCCI sum hmuhna hnar ber a ni a, nikum lama hnehsawh taka lo thleng tawhtu UAE lam an inbuatsaih mup mup bawk.

Test match khelh loh vanga sum chan hnem ber tur ECB lam chuan India chu IPL vanga Test match khelh chhunzawm duh loah an puh a, BCCI lam insawifiah ve bawkin inchirhthehna a thleng ta nuai mai.

Kaikuang Covid
Sports critic, journalist, chanchinbu mi, experts, administrator etc chi hrang hrangin anmahni BEIRUAL THUPUI ngaihnawm tur ber an au chhuahpui ta chuai chuai a.

India hian England-in series an draw an hlau! IPL khelh leh mai tur leh tuna International khel ho quarantine hun nen, ni hnih thum leka test match hnuhnung ber pawhsei leh hi an duh tawh lo; BCCI vang a ni, Cricket schedule tight lutuk vang a ni, a ni ta nuai mai.

Chutah a tuk ni hnih thum lek hnuah, India player hoin sap ram kal bo san vat an thlahlel emaw tih mai turin, IPL khel tur ho Dubai lam panin an thlawk thla nghal zut zut hmuh tur awm si chu meialh hluai vut vut saa 'petrol' theh belh ang lek a ni zui ta.

Hmawr bawk loin an zumsei
He thu buatsaih lai hian, ICC Test Championship thlenga nghawng nei Kumpinu rama India team zinkawng chu pawhchah a ni ta hrih. IPL lamah a hma lawka inhmelma ber emaw kan tih Sam Curran leh Ravindra Jadeja te chu Chennai Super Kings Camp lamah an thawkho leh ṭan tawh.

Chutihrual chuan English player ṭhenkhat last minute a inhnukdawk an awm bawk! Thil pakhat erawh a chiang, a khelmual pawn lamah hian khaw êng ṭha tak ni loin chhum leh ruah surin thil a hliahkhuh hi tam tak a la awm.

Khawvela sports body hausa ber leh India rama Prime Minister dawta thiltihei ber an tih BCCI president Sourav Ganguly a chuan media ho hmaah hun tawite a hmang a, a thusawi hian buaina chu a hmawr bawk loin a zum belh ta zawk.

"Eng dang vang niloin, kan player-ten khelh chhunzawm an duh tawh loh vang a ni."

Indawrna leh a kalpui zel dan tur la neih chhunzawm zel tur a ni a. He inkhel pakhat huaihawt loh avanga sum hloh ringawt pawh hi cheng vaibelchhe 400 vela chhut a ni a, a nghawng hi rin aiin a la kal thui hret thei ang

A pawi a sin
Manchester khaw hmar lama North Yorkshire ram a, Goathland khuaah chuan, September 10-a Old Trafford inkhel en turin Howard-a te pafa chuan, zing takah bus a chuangin, Manchester metro a rail an chuan fe hnuah an tum ram Old Trafford an thleng.

Mahse maw, Old Trafford gate pui an thlen meuh chuan a taka an hmuh châk Virat Kohli a hmuna han sapatal vel chu an hmu thei dawn ta lo a, an lunghnur hle. Howard-a te pafa hian neih thinglung khawnga ruahmanna an lo siam chu tih ṭhuanawpsak a ni ta.

A tu ber hi nge mawhpuh tur hriat a har a, he thil thleng avang hian Cricket game erawh a irh-fiak zeuh kan ti lo thei lo ang. Covid-19 hi i mawhpuh rih zel mai ang u.

- K. Vanlalruata