Leicester leh Napoli inhnehtawk
Premier League club Leicester City chu an mikhual Napoli nen 2-2 in an inhnehtawk. Foxes hian goal hnih an khung hmasak an hum thei lo a, hun tawp dawnah Wilfred Ndidi chu yellow card pahnihna hmuh vangin hnawh chhuah a ni.
Ningani zan Europa League inkhel dangah West Ham erawhin khualmualah Dinamo Zagreb chu 2-0 in an luh chhuah. English club tan hian season bul ṭan fuh Michail Antonio leh Declan Rice ten goal khat ve ve an khung.
Goal a chhuah
King Power Stadium-a inkhelah Leicester lamin bul an ṭan fuh hle, minute kuana lekah Ayoze Perez hmanga goal hmahruai an khung hnuah, second half tir lamah Harvey Barnes chuan an goal hnihna khungin 2-0 in hma an hruai.
Foxes hi an chak dawn niin a lang hman, mahse Napoli striker Victor Osimhen a vanduai reng bik lo. Hun chanve hma lama hun ṭha hloh nualtu hian keeper Kasper Schmeichel a paltlang thei ta a, hun tawp dawnah si phurh sut zawhna a tauh lut leh bawk.
Italian club tan hian Piotr Zielinski, Lorenzo Insigne leh Hirving Lozano ten hun ṭha an nei vek. Mahse, an vannei tawk loh bakah keeper Schmeichel chet ṭhat zan an tawn avangin goal dang an khung thei ta bik lo - point khatah an lungawi a ngai.
Zir tur kan nei
Brendan Rodgers-a'n hliam vangin player thlan chungchangah buaina a la nei, a duh ang thlapin a naute a la rem thei lo. Striker ṭha Jamie Vardy aiah Kelechi Iheanacho chu hun ṭha a pe a, player naupang dangte pawhin hun remchang an hmu bawk.
Leicester manager Rodgers chuan, "Goal hnih neih hnua sut tir leh vek chu a pawi, chutih rualin tihsual vek chu a ni bik lo. Player naupang zawk ten zirlai ṭha tak an zir ni maiah ka ngai. Ṭha taka kan khel chunga point thum kan hmu lo erawh a uiawm hle," a ti.
Napoli manager Luciano Spalletti chuan, "A tir lamah ball kan hloh hnem avangin an tuar a, goal hnih pawh kan chhuah phah reng a ni. Mahse, goal kan phurh hnuah huaisen takin kan bei let, tun ṭuma ka naute rilru put ang kha season hmasa lamah khan hmuh tur a awm lo," tiin chak lo mah se a naute khelh danah a lawm.
West Ham an chak
Qualifying chhiar tel lo chuan West Ham hian kum 1999 hnua a vawi khat nan European football huangah hnehna an chang. Premier League lama hrem vanga an chhawr theih loh tur Antonio-a'n goal a khung chhunzawm a, midfielder Rice chuan a belhchhah bawk.
Minute 21-naah Antonio chuan Kevin Theophile-Catherine-a back pass sual a laksak a, keeper Dominik Livakovic a bum hnuah goal ruakah a khung a, tun season kal laiah goal nga a khung tling der tawh.
Second half-ah Rice a inlar ve thung. England international midfielder hian Hammers tana match 150 a khelh tlin lawm nan a ke vei lam hmangin goal mawi a khung a, mellung pawimawh a phun zana goal a nei hi a lawmawm zual ang.
Moyes a lungawi
Stadion Maksimir-a inkhelah West Ham lamin fans 2000 vel chauh an nei ve thei a, mualneitu lam erawhin fans an nei ṭhahnem hle - inkhel boruak sang leh mipui thawm ri hulh hulh karah David Moyes-a nauten hnehna an chan avangin a lawm hle.
Moyes chuan, "Zagreb hian European football-ah sulhnu ṭha tak tak an nei tih kan hria, chuvangin inkhelh a harsa dawn tih kan hre sa. Fimkhur takin kan khel a, point thum kan hlawh chhuak thei hi a lawmawm takzet.
"Season bul kan ṭan fuh avangin a lawmawm a, chutih rualin eng chena thui nge kan kal theih tih chu a pawimawh lai a ni. Krismas zawh hnuah pawh phur taka European football kan khelh chhunzawm theih a pawimawh ang," a ti.