Turkey-ah United mawng a pawp! Ole Gunnar Solskjaer dinhmun a derthawng

Manchester United-in Nilaini zan khan Champions League-a chak la nei lo bakah goal la khung lo Istanbul Basaksehir an hmachhawn a, Turkish club lakah 2-1 in an tlawm.

Ole Gunnar Solskjaer-a hote tan chak loh hi thil thar a ni tawh lo a, amaherawhchu tun ṭuma an goal chhuah dan erawh thil thleng zen zen ngai lo a nih avangin an mualpho hle.

Istanbul Basaksehir tan Demba Ba-a'n minute 12-naah a khung a, Chelsea striker hlui goal khung tur siamsaktu Edin Visca-a'n minute 40-naah a khung belh.

English club-in minute 43-naah Anthony Martial hmangin an sut ṭhen a, goal dang khung turin second half pum nei mah se goal hlauhawm pawh an insiam thei tawh lo.

Minute 12-naah United-in corner an hmu a, player zawng zawng an chhuak vek a, Basaksehir striker Ba chu vengtu nei loin an awm. 

Turkish club-in an nawr let a, Visca-a'n vengtu nei lo Ba tan ball vawrhin Senegalese striker hian halfway line a pelh loh avangin a offside thei lo a, kum 35 mi ni tawh mah se vengtu nei loin awlsam takin a khalh phei a, keeper Dean Henderson-a dan theih lohin a pet goal.

Basaksehir goal hnihna pawh hi Juan Mata tihsual aṭanga inṭan ni mah se United tlarhnung a pherh hle.

 

Solskjaer-a'n goal venghim tura a dah Aaron Wan-Bissaka, Axel Tuanzebe, Harry Maguire leh Luke Shaw ten an hna an thawk ṭha tawk lo vek a, defence hmaa ding Nemanja Matic thlengin sawiselna hian a kang kai thei ang.

United midfielder hlui Paul Scholes chuan kum 10 hnuai lam goal venhim dan nen a khaikhin a, striker hlui Robin van Persie pawhin khatiang taka talbuai kha a la hmuh ngai loh thu a sawi a, defender hlui Rio Ferdinand pawhin player-te na takin a dem.

Solskjaer chuan, "Khatiang kha chuan goal kan chhuah tur a ni lo. Awlsam taka goal kan chhuah avangin a harsa zo ta vek a ni. Kan hna kan thawk lo a, ka mawhphurhna a ni. Corner kan pet a, goal venhim kan ngaihthah ta daih," tiin mawhphurhtu a nih thu a sawi.

Goal venhim dah ṭhat pawhin Man United khelh danah lawmna tur a awm chuang lo a, manager Solskjaer-a'n midfield a la rem fuh thei lo. Season liam ta tawp lamah player ngai a chhawr tlut tlut a, a tawpah an chau tawngkhawng.

Tun season-ah Paul Pogba an mawhpuh a, Basaksehir nen hian French midfielder hi bench-ah awmin Juan Mata, Matic, Bruno Fernandes leh Donny van de Beek te an lut a, eng ruai an ni lo.

United inkhelah pass sual a langsar. Solskjaer-a'n New-castle United 4-1 a an hneh zawhah 'season a inṭan' ti mah se hemi hnu hian Chelsea nen an inhnehtawk a, Arsenal leh Basaksehir lakah an tlawm. 

Inrinni zan hian United-in Everton an hmachhawn dawn a, a zawna vawi thum an chak lo a nih chuan Norwegian manager hi ban theih reng a ni tawh ang.

Result a ṭhat miau loh avangin Solskjaer ban duhtu an tam hi a mak hran lo a, Tottenham Hotspur ṭha taka enkawltu Mauricio Pochettino lah a âwllai a lo ni bawk nen, Old Trafford-a kal thei mai turin an sawi ri  ṭan ta.

Solskjaer chuan, "Min chhawrtu tana theihtawp chhuah hi ka tih theih chhun chu a ni," tiin a hmalam hun chungchang zawhna a chhang a, United thuneituten an ring zel dawn em tih chu hunin a hril ang.

Roy Keane-a'n United team hi 'leader nei lo' tiin hman ni khan a sawisel tawh a, khelmual chhungah hruaitu nei lo ang maiin an la khawsa zui zel.