Chak lo bawk, hliam ngah bawk = Spurs!

Duhawm taka season bul ṭantu Tottenham Hotspur hlim chhung a rei lo - Europa Conference League-ah an chak zo lo a, player pahnih inhliam neih belh chungin an haw bawk.

Player inhliam ngah tak Spurs hian khualmualah Rennes chu 2-2 in an inhnehtawkpui a, result duhawm lo belhchhah turin midfielder Lucas Moura leh winger Steven Bergwijn chu hliam vangin lakchhuah an ni.

Tottenham manager Nuno Espirito Santo chuan, "Zep tur engmah a awm lo. Dik taka sawi chuan kan dinhmun hi a duhawm lo takzet a ni," a ti a, Spurs fans tan hriat a nuam lo ang.

Result duhawm lo
Spurs-in inkhel ṭan aṭanga minute 11-na lekah goal hmahruai an khung a, Moura ball cross chu Rennes defender Loic Bade chuan dan a tumna lamah an lamah a ti lut. Mahse, mualneitu French club-in Flavien Tait (23') leh Gaetan Laborde (72') hmangin an chhanglet a, Spurs an hawihai.

London club-in kut ruak tawpa haw erawh an duh bik lo. Bench aṭanga luhtir Pierre-Emile Hojbjerg chuan minute 76-naah si phurh a rawn sut ve leh a, goal dang a lut tawh lo thung.

Spurs tan Harry Kane chu Crystal Palace laka 3-0 tlawm team aṭanga bul ṭan nawn pathum zingah tel mah se goal a keng tel lo. English striker hian Spurs tana European football-a inlan hnem ber record a siam a, London club tan hian Europe-ah match 65 khelin goal 40 a khung tawh - Rennes lakah goal a khung thei lo thung.

Damdawi in
Spurs-in France-ah hliam vangin Son Heung-min leh Eric Dier an hruai tel lo a, Giovani lo Celso, Cristian Romero leh Davinson Sanchez ten World Cup qualifier khel tura South America-a an zin avangin quaratine an ni a, squad an la zawm thei lo.

Player pathum hi a hrangin Croatia-ah training neihtir mek an la ni rih a, Moura leh Bergwijn te hliam vanga lakchhuah ve leh an ni ta - Pathianni zan dar 9:00-a Chelsea an hmachhawn theih dawn leh dawn loh a la chiang lo.

Spurs coach Nuno chuan, "Medical team lamin an enkawl mek a, an dinhmun tur kan la sawi thei rih lo," a ti a, an hliam dinhmun a ṭhat loh thu a sawi tel bawk - he thuziak i chhiar meuh chuan an dinhmun tur a chiang tawh ang.