King Carlo hnuaia harhna chang Real Madrid
Spanish chanchinbu lar Marca chuan, "Nipui transfer-a Real Madrid tih fuh ber chu Carlo Ancelotti an la let hi a ni," tiin an ziak a, Italian coach vangin Real chu team ṭha an ni leh taah an ngai.
King Carlo kaihhruai Real Madrid hian Pathianni dar 12:30-ah league match khel turin Valencia an lenchilh dawn a, team pahnih hi La Liga match li khelh tawha la tlawm lo ve ve an nih avangin a awlsam lo ang.
Atletico Madrid chuan zanin dar 7:45-ah Athletic Bilbao an mikhual dawn bawk a, hetihlai hian Barcelona erawh Thawhṭanni zan dar 12:30-ah Granada mikhualin an inlan ve dawn chauh thung.
King Carlo chu
Real Madrid-in Everton-a a hlawh aia hlawh tlem zawk hlawh turin Ancelotti an thlem lut a, Italian coach hnuaiah match nga khelin an la tlawm lo - an khel a hmuhnawm a, Zinedine Zidane-a hnuaia player 'satliah' te kha player ṭhaah a chhuah.
Tun hnaia inhliam leh tawh Gareth Bale pawh a inhliam hma zawng hmun pawimawh a chantir a, a ṭul hunah Eden Hazard 'bench' ah a dah ngam a, a bik takin league match li khelha goal li khung tawh Vinicius Junior chu King Carlo hnuaia khelh hmasawnpui ber a ni.
Brazilian forward hian season khatah goal ruk aia tam khung a nei ngai lo a, Carlo hnuaiah he record hi a khum ngei dawn niin a lang - heng zawng zawng chhanna chu result ṭha a ni a, zaninah Valencia lakah pawh chak tura beisei an ni.
Mahse maw...
Real tan Bale a la inlan thei dawn lo a, Toni Kroos leh Marcelo dinhmun pawh he thu buatsaih a nih thleng hian a la chiang lo - an khelhna tur hmun hi Valencia khelmual a ni bawk a, zuam sual theih an ni.
Valencia hian Real ang thoin league match li an khelh tawhah tlawm an la nei lo a, vawi thum chakin vawi khat an khingpui an inhnehtawkpui. Goal kua khungin an lamah goal hnih a lut a, an tlarhnung a nghet ṭha.
Midfield-ah match li aṭanga goal thum khung tawh Carlos Soler an nei a, tlarhmaah Portugal international Gonçalo Guedes leh Uruguay international Maxi Gómez te ho an awm bawk avangin a awlsam lo ang.
Atletico beiseina
League match li khelh tawha Real leh Valencia ang thoa point 10 nei tawh Atletico-in zanin dar 7:45-ah team ṭha Athletic Bilbao an mikhual dawn a, Champions League-a goal khung loa Porto inhnehtawkpui hlim Atletico tan hna a hautak dawn.
Barcelona-a kum hnih a thang bo hnuah fapa tlanbo ang maiin Atletico-ah Antoine Griezmann a kir a, Diego Simeone-a'n lo lawm viau mah se fan-ten an la ngaidam thei lo a, Catalan club-a auh el tawk nasa tak forward hi Atletico fan-te pawhin an au el nasa thei hle.
French forward hian 'Lal' ang maia a len ṭhinna tuala lawm hlawh leh tur chuan goal khung a mamawh a, tun season-a goal khat chiah la khung Luis Suarez tan pawh a theihna pholan a hun leh tawh.