Forest-in Hughton an ban

Championship club Nottingham Forest chuan an coach Chris Hughton chu league match sarihah vawi ruk a tlawmpui hnuin an ban a, coach lailawk turin Steven Reid chu ruat nghal a ni.

Kum 62 mi Hughton hi October 2020 khan Forest hian an coach Sabri Lamouchi an ban hnuin coach turin an lalut a, hetihlaia an league match hmasa palia tlawm team hi 17-na ni chungin season a kharpui a, point kuain relegation zone chungah an awm.

Mahse, Nilaini zan khan Middlesbrough lakah 2-0 in an tlawm leh a, league match sarihah point khat chiah neia table mawngphah an luah mek avangin Hughton hian a tuar ta a ni.

English club sulhnu nei ṭha pawl Forest chuan, "Club tana Chris-a inpekna zawng zawngah lawmthu kan sawi a, football mai ni lo, khawvelin hun harsa a tawh laiin he club enkawl tur hian a inpe a, khatih chhunga zawnga a hnathawh dan avang khan kan lawm a ni," an ti.

Kum 2017-a Premier League khel tura Brighton & Hove Albion hruai thlengtu Hughton hi English top four league-a coach ban hmasak ber a ni a, an league match hmasa palia an tlawm khan ban tur anga sawi thawm a ri daih tawh.

Mahse, an hmelma Derby County an inhnehtawkpui zui avangin chance pek leh a ni a, Cardiff City leh Boro a zawna a ngam loh leh tak avangin ban a ni ta nge nge.