Goal nga khungtu Lloyd a chawl hnai

United States hmeichhe team chuan nimin khan Paraguay 9-0 in an sawp a, forward Carli Lloyd chuan goal nga khungin ram tana inkhelh a chawlhsan hmain match thum chauh khelh tur a nei tawh.

Tuna US friendly match khelh mek hi Lloyd-i farewell tour hming an vuah a, September 22 hian Paraguay nen friendly match an khelh leh dawn bakah October 22 leh 27 hian South Korea nen an inkhel leh bawk dawn.

Kum 39 mi Carli Lloyd hi hmeichhe football player ropui ber zinga mi a ni a, July 10, 2005 khan United States tan a khel ṭan. Lloyd hian chawimawina ṭhahnem tak a dawng a, United States hi World Cup-ah vawi hnih a champion pui bakah Olympic-ah gold medal vawi hnih a lakpui bawk.

United States forward hian ram tan goal 133 zet a khung a, friendly match vawi thum a khelh leh dawn avangin goal pawh a khung belh leh ngei ang. Lloyd hi Gotham FC tan a khel mek a, October 31 hian Racing Louisville nen tun season-a National Women's Soccer League-a match hnuhnung ber an khel dawn a, chumi zawh chuan football khelh a chawlhsan dawn a ni.