IPL khelh chhunzawn a ni dawn
Indian Premier League chu Pathianni zan dar 7:30 aṭangin khelh chhunzawm a ni dawn. Inelna hi United Arab Emirates-ah khelh a ni dawn.
IPL vawi 14-na hi April 9 khan India ramah khelh ṭan a ni a, May 2 thleng khan match 29 khelh hman ni mah se Covid-19 vangin khelh chhunzawm theih a ni lo.
BCCI-in ngaihtuahna thar a seng a, season liam taa hlawhtling taka inelna neihna hmun UAE-ah bawk inlena nei leh turin thutlukna a siam ta a ni.
Team Dinhmun
India ramah season chanve khelh zawh hman a ni a, tun dinhmunah Delhi Capitals-in hma an hruai mek. Hriat tel tur erawh Delhi hian Punjab Kings nen match riat an khel hman.
Chennai Super Kings-in match sarih an khel tawh a, point 10 hmuin pahnihnaah an awm. Chennai hian Pathianni zan hian champion lai Mumbai Indians an hmachhawn dawn.
Chennai Vs Mumbai
Inkhelhna tur hmun hi Dubai International Cricket Stadium a ni a, Chennai tana chanchin duhawm lo erawh player pawimawh Sam Curran leh Faf du Plessis te an inlan theih a rinawm loh.
Hemi a nih avang hian CSK hian Ruturaj Gaikwad leh Robin Uthappa te bul an ṭantir a rinawm a, MS Dhoni hote hi season liam ta che chhe mah se tun season-ah erawh knockout stage thlen ngei an tum.
Mumbai captain hi Rohit Sharma a ni a, India chauh ni loin khawvel huap pawha bowler ṭha ber zinga mi Jasprit Bumrah an kawl. Champion lai hian South African batsman Quinton de Kock leh West Windies all rounder Kieron Pollard te an kawl bawk a, dah hniam theih an ni lo ang.
Entu lam
UAE-a hian entu an awm thei dawn a, inelna hi stadium pathum Dubai International Cricket Stadium, Sharjah Cricket Stadium leh Sheikh Zayed Cricket Stadium-ah te khelh a ni dawn.
Inkhel entu hi kum 16 chunglam a nih ngei a ṭul dawn a, Covid-19 vaccine full dose la tawh a nih bakah darkar 48 chhung PCR Covid-19 negative test result neih a ngai bawk.
Inkhel en man hi a nawlpuiin Dh 200 a ni dawn a, India pawisa chuan Rs 4,000 vel a ni dawn a, a tlawm lo. India ram aṭanga en tur tan chuan zin man leh hotel thlen man thlenga chhut tel a ṭul bawk ang.