RB Leipzig-in PSG an barakhaih

Champions League group H-a team ṭha bera ngaih Paris Saint-Germain-in Nilaini zan khan RB Leipzig an tlawh a, 2-1 in an chak lo. PSG hian Angel di Maria hmangin minute rukna lekah hma an hruai a, Argentine midfielder hian penalty aṭanga goal khung belhna hun ṭha a hlah.

Minute 42-naah Christopher Nkunku hmangin Leipzig-in siphurh an sut a, minute 57-naa Emil Forsberg penalty hmangin German club-in hnehna an chang. Kylian Mbappe leh Neymar tel lohna PSG-in goal an khung thei lo a, harsatna belhchhah turin midfielder Idrissa Gana Gueye leh defender Presnel Kimpembe te hnawhchhuah an ni.

Leipzig head coach Julian Nagelsmann chuan, "Paris khan an tih ṭhat avanga ti goal an ni lo a, kan tihsual vanga kan lama khung an ni. Penalty an khung loh avangin kan vannei a, kan keeper ṭhat vang a ni thei bawk. Second half-ah khan team ṭha zawk kan nih avangin ball chang tam turin ka player-te ka hrilh a, chak kan phu zawk a ni," tiin a sawi.

Paris manager Thomas Tuchel chuan, "Goal hnihna kan khung thei lo kha kan tuar. Kan khingpui an ṭha a, a tlem zawk kan nih avangin a harsa lehzual. German team ṭha tak laka chak lo kan ni a, ka hnaah hlauhthawnna tur a awmin ka hre lo," tiin ban a la hlauhthawn loh thu a sawi.

PSG hian hliam vangin Mbappe leh Neymar bakah Mauro Icardi, Juan Bernat , Marco Verratti, Julian Draxler leh Leandro Paredes te an chhawr theih loh avangin an chak lo hi a mak hran lo. Season liam ta UCL finalist hian match thum aṭangin point thum chauh an la hmu a, an chungah point ruk hmu pahnih RB Leipzig leh Manchester United te an awm avangin tla thei dinhmunah an ding.