A chung berah Barca; Juve an chak

Lionel Messi-a'n penalty hmang bawkin goal a khung leh ta a, Barcelona chu an mikhual Dynamo Kiev lakah 2-1 in hnehna a chanpui.

Barcelona tan Gerard Pique chuan goal khat a khung ve bawk a, Covid-19 vanga senior player 13 chauh hruai thei Kiev tana Viktor Tsygankov goal khungin awmzia a nei thui lo. 

Group G inkhel dangah Juventus chuan 4-1 in Ferencvaros an sawp bawk a, Cristiano Ronaldo-a'n inkhel bul ṭan mah se tun season-a Champions League match a khelh hmasak berah goal a khung thei lo. 

Juve tan Alvaro Morata chuan goal hnih a khung a, Paulo Dybala leh Lasha Dvali (own goal)-ten goal an khung bawk - Hungarian club tana Franck Boli goal khung chu mualpho lutuk tur khuhna chauh a ni. 

Nou Camp an lenluh hmain Dynamo-in an player parukin Covid-19 an kai thu an sawi a, Barca zin tura an inpuahchah hma hian hripui kai an awm sa tawh bawk - Barcelona pan turin first team player 13 leh youth team player paruk an hruai. 

Kim chung pawha rin hlawh lo zawk Ukrainian club-in minute ngana lekah goal an chhuah nghal a, penalty aṭanga Messi khung a ni - Argentine forward hian tun season-ah match kua khelin goal li a khung a, penalty aṭanga lut vek a ni!

Barca-in ball chang tam mah se beisei angin an khel chhuak lo a, an goal hnihna hlawh chhuak turin minute 65 an nghah thlen a ngai - Pique chuan 2-0 a an hmahruaina ni turin a tauh lut. 

Dynamo captain Tsygankov-a'n minute 75-naah a rawn khung ve a, hliam vanga a inlan theih loh reng hnua goal rawn veng Marc-Andre ter Stegen-a'n a beisei aiin hna a ngah - goal dang erawh an chhuah tawh lo. 

Hetihlai hian Kiev tana si ban nghaktu, kum 18 mi lek goalkeeper Ruslan Neshcheret chu fak phu a ni a, Champions League-a a match hmasa berah Barca hmachhawn nghal mah se a team mualpho lutuk tur a chhanhim.

Covid-19 vanga a chawlh reng hnuah Ronaldo-a'n Juventus jersey haa Champions League-a khelh leh dawn avangin Portuguese forward hi Juve inkhelh hmaa sawi hlawh ber a ni a, a tawpah erawh Morata chanchinin sawi a hlawh ta zawk. 

Kum 28 mi striker hian a chunga rinna nghat ngam coach tan chuan rintlak a ni tih pholangin goal hnih a khung a, Juve tana match 100-a khelh tlinna chu goal nen a lawm. 

Morata hian tun season inelna hrang hrangah match sarih khelin goal ruk a khung a, assist vawi hnih a nei bawk - a goal hnihna hi Ronaldo siamsak a ni.

Spanish striker hian tun season Champions League-ah goal li khungin Manchester United striker Marcus Rashford leh Liverpool forward Diogo Jota-te nen top scorer an ni mek. 

Juve tan Dybala chuan goal khat a khung ve leh a, goal khungpui mamawh lo mah se Ferencvárosi defender Dvali chuan an lamah a ti lut bawk - minute 90-naah Hungarian club tan Boli-a'n khung ve mah se harh chhuah nan a tlai tawh.