Man City an inhnehtawk, Pep a inthiam lo
Premier League champion lai Manchester City chuan Inrinni zan khan Southampton an mikhual a, goal an khung theih loh avangin 0-0 in an inhnehtawk. Pep Guardiola hoten goal zawnah vawi khat chiah an pet a, Man City-in match nga khelha point 15 hmuh theih aṭangin point 10 chauh an hlawh chhuak.
Goal khung thei?
Man City hian Saints an mikhual hma hian tun season bikah Etihad Stadium-ah match thum an khel tawh a, goal 16 tehmeuh an khung. Pep-a hote hian Championship champion Norwich City leh Arsenal 5-0 ve vein an sawp a, Champions League-ah RB Leipzig 6-3 in an hneh leh bawk.
Inrinni zan Premier League inkhelah erawh Man City tlarhma an bil a, chance ṭha insiam an harsat. First half-ah Ilkay Gundogan-a'n hnai tak aṭangin a tauh goal lo a, pound maktaduai 100 man Jack Grealish-a'n danglamna a thlen thei lo a, bench aṭanga rawn lut Kevin de Bruyne leh Phil Foden ten goal an keng tel lo bawk.
Injury time-ah substitute Foden-a ball tauh chu Saints keeper-in a dan hnuah Raheem Sterling-a'n goal-ah a khung. VAR hmangin hun rei tak en a nih hnuah offside vangin goal hi pawm a ni lo.
Saints an vanduai
VAR-in Man City goal khung an pawm loh avangin an vanduai a tih theih a, chutihrualin vanduai zawk tak erawh Saints a tih theih thung. Man City defender Kyle Walker cuan box chhungah Adam Armstrong a titlu a, referee-in penalty a pek bakah Walker hi red card a pe.
Man City hi VAR-in a chhan a, referee Moss-a'n mual sira 'monitor' a en hnuah thutlukna pahnih hi a sut. Moss hian thutlukna hi kaltlangpui ta zawk pawh ni se sawisel an tlem pharh ang.
Southampton hian Manchester United laka point thum hmuh an phu chungin 1-1 a an inhnehtawk avangin point khat chiah an hlawh chhuak a, Man City nen pawh hian an khelh ṭhat avangin point khat aiin point thum an phu zawk. Saints hian match khelhah chak an la nei lo a, vawi li an inhnehtawk tawh thung.
Mawhphurtu Pep
Man City-in Community Shield-a Leicester City an hneh loh hnuah league match hmasa berah Tottenham an hneh lo a, hemi hnu hian Pep Guardiola hote hi an insiamṭhaah a ngaih theih. Mahse, Man City an la buai tho - goal khung harsat ṭuma goal khung thei tur 'goal thei bik player' an kawl lo.
Premier League champion-in Foxes leh Spurs an hneh loh ṭumin goal an khung lo a, Saints nena goal an khung loh avangin point hnih an hloh. Pep Guardiola chuan, "Kan khelh ṭhat loh hian hrehawm ka ti ṭhin. Entu mipuiin hmuhnawm en an duh a, keini lamin kan hmuhtir theih loh hian ka inthliam lo ṭhin," tiin mawhphurtu a nih thu a sawi.
Pep hi player thlangtu a nih avangin mawhphurtu chu a ni chiang. UCL-ah RB Leipzig 6-3 in an sawp a, player panga ngawt a thlak. Oleksandr Zinchenko, Kevin De Bruyne, Rodri, Riyad Mahrez leh Ferran Torres te chu bench-ah awmin Saints lakah hian Kyle Walker, Gundogan, Fernandinho, Gabriel Jesus leh Raheem Sterling te a luhtir. Saints laka point an hloh chhanah pawh Pep-a'n player a thlak nasa hi a mawhpuh theih.
Chutihrualin khelmual pawn lamah boruak a ṭha tawk lo. Leipzig nen an inkhelh ṭum hian entu 52,698 an nei thei chungin entu 38,062 chauh an nei. Pep-a'n thlawpna ṭha zawk a beisei thu a sawi a, Man City ṭantuten a hna thawk turin an ti.
Saints nena an inkhelh hmain Spanish manager hian Man City ṭantute chungah ngaihdam a dil loh tur thu sawi mah se kartawp Premier League inkhelah erawh entu an tam a, goal erawh an au chhuak thei lo.
Man City hian Thawhlehni zan hian League Cup-ah Wycombe an hmachhawn dawn a, Inrinni zanah Stamford Bridge-ah Chelsea hmachhawn turin an lenglut dawn. Champions League final rematch hi a hmuhnawm ang.