Mizoram cricket team coach a thi

Cricket Association of Mizoram (CAM) hnuaia mipa under 19 coach Murtuza Lodghar chu September 17, Zirtawpni tlai khan lungphu chawl vangin a thi a, Mizoram team camp a neih puina hmun Visakhapatnam-ah an phum nghal.

Kolkata mi Lodghar hian season hmasa aṭang khan Mizoram under 19 team hi a enkawl a, tun season-ah pawh enkawl chhunzawm leh tur a ni. Mahse, inelna hmachhawn tura inbuatsaihna camp a neihpui laiin chanchin lawmawm lo a nei ta a ni.

CAM honorary secretary Mamon Maj-umdar chuan, "Zirtawpni tlai khan Murtuza Lodghar hi insawizawi turin an chhuak a, mahse vanduaina hi a tawk. Damdawi in panpui ni mah se a nunna chhan hman a ni tawh lo, CAM chuan a pawi kan tiin kan tuar takzet," tiin Vanglaini a hrilh.

Cricket Association of Mizoram president Robert Lalfamkima pawhun a ui thu sawiin, "Murtuza chunga thil thleng hi a pawi ka ti, a chhungte ka tawrhpui hle. Mizoram cricket team tana a sulhnu hi hriatreng a ni tawh ang, thlamuang takin chawl rawh se," tiin Mizoram coach a thlah.