Mane 100; Liverpool 3; Palace 0

Liverpool chuan Premier League champion ni turin an ṭha tawk tih an pholang leh ta a, Inrinni zan khan an mikhual Crystal Palace chu 3-0 in an hneh.

Sadio Mane chuan Liverpool tana a goal 100-na hmangin goal hmahruai a khung a, goal khung bansan thei lo Mohamed Salah leh Naby Keita ten goal khat ve ve an khung bawk.

Tun season league match nga an khelhah Reds hi an la tlawm lo -point 13 hmuin table chung ber an luah mek.

Nizan inlan Manchester United leh Chelsea an chak chuan Liverpool nen an point hmuh zat a inang ang. He thu buatsaih a nih lai hian result kan hre hman lo.

Liverpool hian Thawhlehni zan dar 12:15-ah League Cup third round khel turin Norwich City an lenchilh zui ang.

Welcome to 100
Anfield-a inkhelah rin ai takin Palace an tlangnel a, inkhel ṭantir lamah vawi hnih lai post an tih per hman. Liverpool si ban nghaktu Alisson a che ṭha bawk.

Reds lamin chance an nei ve tho a, Palace keeper Vicente Guaita-a'n Thiago Alcântara leh Jordan Henderson khung tur ṭha taka a dan bakah Diogo Jota chuan goal ruak a hmachhawn chungin bar chung lamah a thlawh bawk.

Mane erawh dan reng theih a ni lo. Minute 43-naah Konstantinos Tsimikas corner aṭanga ball kal, Salah-a'n ṭha zeta a tauh chu Guaita chuan lo dang hman mah se Mane ke bulah a tla a, kum 29 mi hian a hlah lo.

Senegalese forward hian Reds tan match 224-ah goal 100 a khung tling ta a, league-ah a zawna Palace-a hmachhawn vawi kuaah goal a khung vek. Khingpui pakhat laka league-a a zawna heti zat goal khung thei hmasa ber a ni - tun season-ah match ruk khelin goal thum a khung ta.

Salah, i zunzam a ni
Mane-a'n mellung pawimawh a phun zanah pawh Salah bawk a langsar. Egyptian forward hian Mane goal khung tur a thawhchhuah hnuah goal a khung ve leh a, Jaïro Riedewald ven aṭanga tal putin corner aṭanga ball kal chu a pet goal.

Salah hian league-ah match nga khelin goal li a khung leh ta der a, assist vawi hnih a nei bawk - Liverpool tan match 209 a khelhah goal 130 a khung tawh a, Premier League-ah Reds tan match 150 a khelh aṭangin goal 99 a khung tawh.

Liverpool an phur tawh laklawh a, hun tawp nan minute khat chiah a awm tawh tihah Naby Keita chuan ṭha zetin a thlawh lut ve leh - hun a tawp zui a, Anfield-ah chak phu zawk Liverpool an chak.

Hetihlai hian chawn hliam vangin Thiago lakchhuah a ni a, Liverpool boss Jurgen Klopp chuan, "A chawn kha na a ti deuh a, hliam serious tak a nih loh kan beisei," a ti a, he thu buatsaih lai hian a dinhmun chiang takin a la sawi theih loh.

Player siksawi
Klopp-a'n a sawi lawk ang ngeiin player a siksawi a, Trent Alexander-Arnold leh Andy Robertson chu bench-ah an awm a, nipui transfer-a Liverpool lakluh awmchhun Ibrahima Konate chuan a vawi khat nan bul a ṭan bawk.

Tsimikas-a'n Robertson awm loh lai pawhin manganna tur a awm lo tih left back-ah a pholang nawn a, right back-ah Milner a khel ṭha a, Konate pawh Reds squad chhah takzia pholanna a ni.

Klopp chuan, "Trent bul ṭantir ka tum a, mahse, chawlh a duh avangin kan chawlhtir. Hetiang hian team ka thlak fo ang em, ka sawi thei lo - tun hma pawhin ka thlak fo tawh a, team tana ṭha ber tur kha kan ngaihtuah chu a ni mai," a ti.

Virgil van Dijk chuan Liverpool tana a Premier League match 100-na a khel a, hetih chhung hian vawi riat chiah a tlawm - Hendo chuan a vawi 200 nan Reds captain armband a hreng bawk.