Goal ruk khung thei Inter Milan

Real Madrid lakah goal khung thei lo mah se Inter Milan an tho chhuak. Serie A champion hian an mikhual Bologna chu 6-1 in an sawp a, match li aṭanga point 10 hmuin league table-ah hma an hruai lailawk.

Match thum an khelh china la chak vek - AS Roma, AC Milan leh Napoli ten an khelh hmabakah hnehna an chang a nih chuan Inter hi an tlanpel leh rih ang, season dang zawng aiin team an inel tawk dawn niin a lang.

Goal a sur
Inter hian San Siro-ah Real Madrid an mikhual ṭumin hun ṭha an bawhpelh hnem a, minute 90 chhungin goal an khung thei lo. Spanish club lian laka hun remchang tam tak hlahtu striker Edin Dzeko chuan Bologna lakah hian goal hnih a khung.

Manchester City striker hlui Dzeko-a'n goal a khung hma hian Lautaro Martinez, Milan Skriniar, Nicolo Barella leh Matias Vecino ten goal khat ṭheuh an khung hman a, mikhual team tan hun tawp dawna Arthur Theate goal khung chuan an mualpho a hliah khuh phak lo.

Inter hian season hmasa champion puitu manager Antonio Conte leh an goal khung hnem ber Romelu Lukaku an chan a, mahse manager thar Simone Inzaghi kaihhruaina hnuaiah match li chu tlawm loin an kaltluang ta.

Inzaghi naute hian tun season an league match hmasa paliah hian goal 16 zet an khung a, 1960-61 season hnu lamah kum tir lama goal an khung hnem ber ṭum an tawng, nomawi an kawl lai pawh humhim an tum ngei ang.

Hakimi thlaktu Dumfries
Inter Milan hian an defender pawimawh Achraf Hakimi chu Paris Saint-Germain lakah an chan a, a hmun ruak luah turin Denzel Dumfries an lalut. Dutch defender hi season tir lamah hliam vangin a inlan nghal lo, Real an hmachhawn ṭumin a inlan ṭan a, tunah chuan a vawi khat nan bul a ṭan.

Euro 2020-a khel ṭha tak Dumfries hian goal venhim bakah a nawr lamah tha a thawh hlawk ṭhin; Bologna lakah pawh a ṭhiante goal khung tur vawi hnih lai a siamsak a, club thar tana league match bul ṭan hmasak berah a khel ṭha hle.

Kum 25 mi Dumfries chuan, "Real Madrid kan hneh loh hnua kan thawhchhuah leh dan hi a lawmawm hle, kan vaiin kan khel ṭha vek. Coach-in goal nawr turin min ti a, min tih ang ngeiin ka khel," tiin a sawi a, thlawpna ṭha a dawn vanga a lawm thu a sawi bawk.

Dumfries bakah hian Alexis Sanchez chu tun season bika a vawi khat nan a inlan. Chile international forward hian Dzeko khung tur a siamsak ve bawk a, coach Inzaghi tan chuan player chhawr tura an dam chho ta hi chanchin ṭha a ni ang.